امریکی صدر نے ایران کی سات روزہ جنگ بندی کی تجویز مسترد کردی

امریکی اخبار ‘وال اسٹریٹ جرنل’ نے دعویٰ کیا ہے کہ امریکی صدر ڈونلڈ ٹرمپ نے ایران کی جانب سے پیش کی جانے والی 7 روزہ جنگ بندی کی تجویز کو مسترد کر دیا ہے۔ ذرائع کے مطابق، صدر ٹرمپ نے اپنے مشیروں سے گفتگو کرتے ہوئے اشارہ دیا ہے کہ نومبر میں ہونے والے امریکی مڈ ٹرم انتخابات کے بعد ایران پر دوبارہ بمباری کا سلسلہ شروع ہو سکتا ہے۔ رپورٹ کے مطابق امریکی صدر کو اس بات پر فی الحال یقین نہیں ہے کہ تہران واشنگٹن کے تمام مطالبات تسلیم کرے گا، تاہم امریکی حکام کا کہنا ہے کہ آنے والے دنوں میں یا مڈ ٹرم نتائج کے بعد صدر ٹرمپ کا موقف تبدیل بھی ہو سکتا ہے۔

وال اسٹریٹ جرنل کے مطابق، ایرانی وزیرِ خارجہ عباس عراقچی کی جانب سے پیش کی گئی اس ۷ روزہ تجویز میں یہ شرط شامل تھی کہ اگر امریکہ ایرانی بندرگاہوں کی بحری ناکہ بندی ختم کرے، تیل پر سے پابندیاں اٹھائے اور لبنانی محاذ پر بھی جنگ بندی کی پاسداری کرے، تو ایران بدلے میں تزویراتی نقطہ نظر سے اہم آبنائے ہرمز کو دوبارہ تجارتی نقل و حمل کے لیے کھول دے گا اور جوہری مذاکرات کا باقاعدہ آغاز کرے گا۔ تاہم امریکی انتظامیہ نے ثالثوں کو واضح کر دیا ہے کہ وہ ناکہ بندی ختم کرنے یا ایران کی ان شرائط کو ماننے کے موڈ میں نہیں ہے۔