پی ٹی آئی دہشت گردی کے خلاف جنگ میں دہشت گردوں کے ساتھ ہے: خواجہ آصف

وفاقی وزیر دفاع خواجہ آصف نے پاکستان تحریک انصاف (پی ٹی آئی) کو شدید تنقید کا نشانہ بناتے ہوئے کہا ہے کہ پی ٹی آئی حکومت کا سب سے بڑا اور ناقابل معافی جرم دہشت گردی کے خلاف جنگ سے لاتعلقی اختیار کرنا اور بھتے کی صورت میں دہشت گردوں کو مالی وسائل فراہم کرنا ہے، اور حقیقت یہ ہے کہ پی ٹی آئی اس جنگ میں بالواسطہ طور پر دہشت گردوں کے ساتھ کھڑی ہے۔

سماجی رابطے کی ویب سائٹ ’ایکس‘ پر جاری اپنے تفصیلی بیان میں وزیر دفاع کا کہنا تھا کہ خیبرپختونخوا کی صورتحال کو محض پی ٹی آئی کی کسی سیاسی سرگرمی، احتجاج یا لانگ مارچ کے تناظر میں دیکھنا اصل اور بنیادی مسئلے سے جان بوجھ کر نظریں چرانے کے مترادف ہے۔ انہوں نے سوال اٹھایا کہ آخر ایک صوبائی حکومت کی جانب سے کب تک وفاقی دارالحکومت پر چڑھائی کرنے کی کوششیں جاری رہیں گی، اور صوبائی اقتدار پر قابض پارٹی کب تک ریاست اور وفاقی اداروں کے ساتھ محاذ آرائی کا راستہ اپنائے گی؟ انہوں نے استفسار کیا کہ اس روش کے ملک و قوم کے لیے کتنے خطرناک نتائج نکل سکتے ہیں؟

خواجہ آصف نے صوبائی حکومت کی کارکردگی پر سوالیہ نشان لگاتے ہوئے پوچھا کہ کیا خیبرپختونخوا میں دن بدن بڑھتے ہوئے دہشت گردی کے خطرات کے مقابلے میں صوبائی حکومت نے اپنی آئینی اور انتظامی ذمہ داریاں پوری کی ہیں؟ انہوں نے الزام عائد کیا کہ جب سے خیبرپختونخوا میں پی ٹی آئی کی حکومت بنی ہے، ان کا واحد ایجنڈا اپنی جیبیں گرم کرنا، سرکاری خزانے کو لوٹنا اور لوٹ مار کے اس مال کا حصہ اپنی مرکزی قیادت تک پہنچانا رہا ہے۔

وزیر دفاع نے مزید کہا کہ شہداء کے جنازوں میں صوبائی حکومت کے نمائندوں کی عدم موجودگی، ان کے سوگوار خاندانوں کے ساتھ لاتعلقی، دہشت گردوں کے حق میں سازگار بیانیہ بنانا اور ان کی سہولت کاری کرنا، پولیس اور محکمہ انسدادِ دہشت گردی (CTD) کی پیشہ ورانہ استعداد بڑھانے سے دانستہ غفلت برتنا، اور قبائلی اضلاع (محروم و ضم شدہ اضلاع) میں مؤثر گورننس پر کوئی توجہ نہ دینا ایسے سنگین معاملات ہیں جن پر کڑی نظر رکھی جانی چاہیے۔

بیان کے آخر میں خواجہ آصف نے اس عزم کا اعادہ کیا کہ امن و امان کا قیام، مؤثر انسدادِ دہشت گردی، فنکشنل حکمرانی، وفاقی استحکام اور آئینی تقاضوں کی تکمیل ہی ہمارا اصل قومی ایجنڈا ہے، اب پی ٹی آئی کو خود فیصلہ کرنا ہوگا کہ ان کا نصب العین صرف ایک شخص یا گروہی مفادات کا حصول ہے یا پھر وطن عزیز پاکستان کے استحکام اور ترقی کا ایجنڈا ہے۔