فیلڈ مارشل کی سعودی وزیرِ دفاع سے ملاقات، دفاعی تعاون جاری رکھنے کا عزم

چیف آف ڈیفنس فورسز فیلڈ مارشل سید عاصم منیر نے سعودی عرب کے دارالحکومت ریاض میں سعودی وزیرِ دفاع شہزادہ خالد بن سلمان سے ایک اہم ملاقات کی ہے جس میں دوطرفہ دفاعی تعاون جاری رکھنے اور خطے کے امن کے لیے مشترکہ لائحہ عمل پر تفصیلی تبادلہ خیال کیا گیا۔

سعودی دارالحکومت میں ہونے والی اس ملاقات کے دوران ‘مکہ دفاعی تعاون معاہدے’ میں شامل ممالک کے سربراہانِ افواج کے حالیہ اجلاس کے نتائج کو بھرپور انداز میں سراہا گیا۔ دونوں رہنماؤں نے مکہ مکرمہ اور مملکتِ سعودی عرب میں شہری آبادی اور اہم اقتصادی تنصیبات کو نشانہ بنانے والے حالیہ حملوں پر گہری تشویش کا اظہار کرتے ہوئے ان کا مشترکہ طور پر مقابلہ کرنے کے عزم کا اعادہ کیا۔

ملاقات میں اس بات پر زور دیا گیا کہ مکہ دفاعی تعاون معاہدے کے تحت دونوں برادر ممالک کسی بھی جارحیت کے خلاف باہمی تعاون کو مزید مؤثر بنائیں گے۔ اس موقع پر سعودی عرب کے وزیر مملکت، رکنِ مجلسِ وزرا اور قومی سلامتی کے مشیر ڈاکٹر مساعد بن محمد العیبان، چیف آف جنرل اسٹاف جنرل فیاض بن حامد الرویلی اور وزیر دفاع کے انٹیلی جنس امور کے مشیر ہشام بن عبدالعزیز بن سیف سمیت دیگر اعلیٰ عسکری و سول حکام بھی موجود تھے۔

بعد ازاں، سعودی وزیرِ دفاع شہزادہ خالد بن سلمان نے سماجی رابطے کی ویب سائٹ ’ایکس‘ پر اپنے بیان میں بتایا کہ ملاقات کے دوران معاہدہ مکہ برائے مشترکہ دفاع سے متعلق چیفس آف اسٹاف کے اجلاس کی پیش رفت پر مکمل اطمینان کا اظہار کیا گیا ہے۔ انہوں نے مزید کہا کہ پاکستان اور سعودی عرب اسٹریٹجک معاہدے کے دائرہ کار میں رہتے ہوئے مشترکہ اقدامات اور دفاعی تعاون کو مزید مستحکم کرنے کے لیے اپنی کوششیں جاری رکھیں گے۔