امریکا سے واپسی پر وزیراعظم لندن میں دو سے تین روز قیام کریں گے

وزیراعظم شہباز شریف اقوامِ متحدہ کی جنرل اسمبلی کے 81 ویں اجلاس میں شرکت کے بعد امریکی دورہ مکمل کر کے لندن پہنچ رہے ہیں، جہاں وہ دو سے تین روز قیام کریں گے۔ نیویارک میں قیام کے دوران وزیراعظم نے جنرل اسمبلی سے اپنے اہم خطاب میں عالمی امن، مشرقِ وسطیٰ کی کشیدگی، مسئلہ فلسطین اور علاقائی سیکیورٹی پر پاکستان کے موثر سفارتی اور ثالثی کردار کو اجاگر کیا۔ اس کے علاوہ انہوں نے اقوامِ متحدہ کے سیکرٹری جنرل انتونیو گوتریس سمیت عالمی رہنماؤں اور کاروباری شخصیات سے بھی اہم سائیڈ لائن ملاقاتیں کیں۔

ذرائع کے مطابق، وزیراعظم شہباز شریف لوٹن ایئرپورٹ لندن پہنچیں گے جہاں قیام کے دوران وہ اپنا تفصیلی طبی معائنہ کروائیں گے اور ذاتی مصروفیات کے بعد 27 یا 28 ستمبر کو ان کی وطن واپسی متوقع ہے۔ سیاسی ماہرین کے مطابق وزیراعظم کی غیر ملکی دورے سے واپسی کے بعد ملک میں امن و امان کی صورتِ حال اور خیبر پختونخوا میں پیدا ہونے والے آئینی و انتظامی چیلنجز پر اہم فیصلے متوقع ہیں۔