کپل شرما ’’دی گریٹ انڈین کپل شو‘‘ کے پانچویں سیزن کے ساتھ واپس آگئے

نیٹ فلکس کے مقبول ترین کامیڈی شو ’’دی گریٹ انڈین کپل شو‘‘ کا پانچواں سیزن تقریباً چھ ماہ کے وقفے کے بعد ایک بار پھر واپس آ رہا ہے، جس کی پہلی قسط 26 ستمبر سے ہر ہفتے کی رات 8 بجے نشر کی جائے گی۔ اس نئے سیزن کی افتتاحی قسط میں بالی ووڈ اداکار اجے دیوگن اپنی متوقع تھرلر فلم ’’درشیم: دی کنکلوژن‘‘ (درشیم 3) کی کاسٹ اور ہدایت کار ابھیشیک پاٹھک کے ساتھ بطورِ مہمان شرکت کریں گے۔ شو کے مرکزی میزبان کپل شرما کے ساتھ سنیل گروور، کرشنا ابھیشیک، کیکو شاردا، ارچنا پورن سنگھ اور نوجوت سنگھ سدھو ایک بار پھر ناظرین کو ہنسانے کے لیے میدان میں موجود ہوں گے۔

افتتاحی قسط کی تشہیری جھلکیوں کے مطابق، فلم کی کاسٹ جن میں شریا سرن، ایشیتا دتا، مرنال جادھو اور جے دیپ اہلاوت شامل ہیں، کپل اور ان کی ٹیم کے ساتھ مزے دار گفتگو اور مختلف تفریحی سرگرمیوں کا حصہ بنیں گے۔ شو میں سنیل گروور کی جانب سے اجے دیوگن کی نقل، کیکو شاردا کی ‘سونا اور مونا 2.0’ کے روپ میں واپسی اور جے دیپ اہلاوت کا کرشنا ابھیشیک کے ساتھ ڈانس خصوصی توجہ کا مرکز رہے گا۔ واضح رہے کہ اجے دیوگن کی فلم ’درشیم: دی کنکلوژن‘ 2 اکتوبر کو سینما گھروں میں ریلیز کی جا رہی ہے، اور اس شو میں ان کی آمد کو فلم کی تشہیری مہم کا ایک اہم حصہ قرار دیا جا رہا ہے۔