4 فلسطین نواز کارکنوں کی رہائی کا مطالبہ، تیونس میں سیکڑوں افراد سڑکوں پر نکل آئے

تیونس میں سیکڑوں مظاہرین نے سڑکوں پر نکل کر ان چار فلسطین نواز کارکنوں کی فوری رہائی کا پرزور مطالبہ کیا ہے جنہیں غزہ کے لیے انسانی امدادی بحری بیڑے کے انتظام و انصرام میں مدد فراہم کرنے پر منی لانڈرنگ کے الزامات کے تحت گرفتار کیا گیا تھا۔ مارچ میں حراست میں لیے گئے ان چاروں کارکنوں پر الزام عائد کیا گیا ہے کہ انہوں نے ‘گلوبل صمود فلوٹیلا’ کے لیے جمع کیے گئے امدادی فنڈز کا غلط استعمال کیا۔ واضح رہے کہ یہ بحری بیڑہ 2025ء میں غزہ کے محصور عوام تک انسانی امداد پہنچانے کے مقصد سے روانہ ہوا تھا۔

گلوبل صمود فلوٹیلا نے اپنے کارکنوں کی گرفتاری کی شدید مذمت کرتے ہوئے ان کی بلا تاخیر رہائی کا مطالبہ کیا ہے۔ تنظیم کی جانب سے جاری کردہ تازہ ترین بیان میں انکشاف کیا گیا ہے کہ غیر قانونی قید کے خلاف بھوک ہڑتال پر بیٹھے گرفتار کارکنوں کی حالتِ صحت روز بروز تشویشناک حد تک خراب ہو رہی ہے۔ ان کارکنوں کی گرفتاری ایک ایسے وقت میں عمل میں آئی تھی جب تنظیم تیونس سے ایک نئے امدادی مشن کی روانگی کی تیاریاں کر رہی تھی، جسے بعد ازاں پیدا شدہ حالات کے باعث منسوخ کرنا پڑا تھا۔