ملک بھر میں ایم ڈی کیٹ ٹیسٹ شروع، ایک لاکھ 38 ہزار 158 امیدوار شریک

پاکستان بھر میں میڈیکل اور ڈینٹل کالجز میں داخلے کے لیے لازمی قومی امتحان “ایم ڈی کیٹ 2026” (MDCAT 2026) کا باقاعدہ آغاز ہو گیا ہے، جس میں ملک اور بیرونِ ملک سے مجموعی طور پر 1 لاکھ 38 ہزار 158 امیدوار شرکت کر رہے ہیں۔ پاکستان میڈیکل اینڈ ڈینٹل کونسل (PMDC) کے مطابق ٹیسٹ کا انعقاد ملک کے 34 شہروں کے علاوہ سعودی عرب کے شہر ریاض میں قائم امتحانی مراکز میں بیک وقت کیا جا رہا ہے۔ تین گھنٹے دورانیے کے اس امتحان میں پنجاب سے 49,199، خیبر پختونخوا سے 38,841، سندھ سے 34,233 اور بلوچستان سے 9,923 امیدوار رجسٹرڈ ہیں، جبکہ آزاد کشمیر، گلگت بلتستان، اسلام آباد اور ریاض سے بھی ہزاروں طلباء امتحان دے رہے ہیں۔

پی ایم ڈی سی نے شفافیت قائم رکھنے کے لیے 8 ہزار سوالات کا بینک تیار کیا ہے جس کے تحت ہر صوبے کے لیے 180 سوالات پر مشتمل الگ پرچہ مرتب کیا گیا ہے۔ امتحانی انتظامیہ کی جانب سے امتحانی مراکزمیں موبائل فونز اور تمام ڈیجیٹل ڈیوائسز پر مکمل پابندی عائد کی گئی ہے، جبکہ امتحان کے اختتام پر سوالیہ پرچہ نگران عملے کے سپرد کرنا لازمی قرار دیا گیا ہے ورنہ نتیجہ منسوخ کر دیا جائے گا۔ اس سال ایم ڈی کیٹ میں ایک بڑی انتظامی تبدیلی کرتے ہوئے جیوینائل کارڈ کی شرط کو ختم کر دیا گیا ہے اور طلباء کو اصل مارک شیٹ کے ذریعے شناخت کی اجازت دی گئی ہے۔