آج کراچی کینٹ ریلوے سٹیشن سے تاریخی مارچ کا آغاز ہوگا: حافظ نعیم الرحمان

پٹرولیم لیوی، ظالمانہ ٹیکسز اور غیر معمولی مہنگائی کے خلاف جماعت اسلامی کراچی کا گورنر ہاؤس کے باہر جاری 35 روز پر محیط تاریخی دھرنا بالآخر ختم ہو گیا۔ دھرنے کے شرکاء سے اختتامی خطاب کرتے ہوئے امیر جماعت اسلامی پاکستان حافظ نعیم الرحمان نے اعلان کیا کہ اب کراچی کینٹ اسٹیشن سے اسلام آباد کی جانب تاریخی لانگ مارچ کا آغاز ہو رہا ہے، جس میں خیبر پختونخوا، بلوچستان اور پنجاب سمیت پورے سندھ سے قافلے شرکت کریں گے۔ انہوں نے کہا کہ پورا ملک اب اس احتجاجی تحریک سے جڑ چکا ہے اور یہ جدوجہد کسی ایک دو دن کی بات نہیں بلکہ ملک سے آئی پی پی، شوگر، آٹا اور بینکنگ مافیا کا خاتمہ کرنے تک جاری رہے گی۔

دوسری جانب جماعت اسلامی اور حکومتی وفد کے درمیان مذاکرات کا پانچواں دور بغیر کسی حتمی نتیجے کے ختم ہو گیا۔ مذاکراتی عمل کے بعد میڈیا سے گفتگو کرتے ہوئے نائب امیر جماعت اسلامی لیاقت بلوچ نے بتایا کہ حکومتی ٹیم نے سیکیورٹی خدشات کو بنیاد بناتے ہوئے لانگ مارچ ملتوی کرنے کی درخواست کی اور آئی ایم ایف کے شدید دباؤ کا حوالہ دیا، تاہم حکومت نے عوام کو جلد غیر معمولی ریلیف دینے کی یقین دہانی بھی کرائی ہے۔ لیاقت بلوچ نے واضح کیا کہ اگر حکومت نے عوام کے مطالبات پر عملی پیشرفت نہ کی تو پٹرولیم لیوی کے مکمل خاتمے تک احتجاج اور اسلام آباد کی جانب پیش قدمی ہر صورت جاری رہے گی۔