اسرائیلی فوج کی غزہ اور جنوبی لبنان میں بمباری، غزہ میں 3 افراد شہید

اسرائیلی فوج نے غزہ کی پٹی اور جنوبی لبنان کے مختلف علاقوں پر ایک بار پھر شدید بمباری کی ہے، جس کے نتیجے میں غزہ میں 3 فلسطینی شہید ہو گئے ہیں۔ عالمی خبر رساں ایجنسیوں کے مطابق اسرائیلی جنگی طیاروں نے جنوبی لبنان کے علاقے حداتا اور حاریس کے درمیان واقع ایک رہائشی مکان کو فضائی حملے میں نشانہ بنا کر مکمل طور پر تباہ کر دیا، جبکہ اس کے ساتھ ساتھ اسرائیلی بری فورسز کی جانب سے علاقے میں شدید شیلنگ اور گولہ باری بھی کی گئی۔

عرب خبری ادارے ‘الجزیرہ’ نے لبنان کی سرکاری نیشنل نیوز ایجنسی کے حوالے سے بتایا کہ اسرائیلی طیاروں نے خطے میں بلا تعطل شدید بمباری کی جس سے عمارتیں لرز اٹھیں اور رہائشی مکان زمین بوس ہو گیا۔ حملے کے فوراً بعد امدادی ٹیموں نے متاثرہ علاقے کا محاصرہ کر لیا ہے، تاہم جنوبی لبنان میں ہونے والے اس حملے میں تاحال جانی نقصان کی حتمی تفصیلات سامنے نہیں آ سکی ہیں۔