مصنوعی پلکیں بینائی کی دشمن

انسانی جسم کا انتہائی حساس عضو آنکھیں حسن و آرائش کے غیر محتاط طریقوں سے شدید متاثر ہو سکتی ہیں۔ یورپی سوسائٹی آف کیٹریکٹ اینڈ ریفریکٹیو سرجنز (ESCRS) کی 44 ویں کانگریس میں یوکرین کی نیشنل پیروگوف میموریل میڈیکل یونیورسٹی کے ماہرین امراضِ چشم نے ایک اہم تحقیقی رپورٹ پیش کی ہے، جس کے مطابق مصنوعی پلکیں (Eyelash Extensions) لگوانے سے آنکھوں میں مائٹس (طفیلی کیڑے) کی افزائش اور بینائی کی پیچیدگیوں کا شدید خطرہ بڑھ جاتا ہے۔ ڈاکٹر ٹیٹیانا ژمد کی سربراہی میں 345 خواتین پر کی گئی اس تحقیق سے معلوم ہوا کہ باقاعدگی سے مصنوعی پلکیں استعمال کرنے والی 96 فیصد خواتین کی پلکوں میں ‘ڈیموڈیکس’ (Demodex) نامی خوردبینی کیڑے پائے گئے۔

طبی ماہرین کے مطابق مصنوعی پلکیں چپکانے کے لیے استعمال ہونے والے خشک گوند میں جلد کے مردہ خلیے اور تیل جمع ہو جاتا ہے، جو ان مائٹس کی بہترین غذا بنتا ہے۔ یہ کیڑے آنکھوں کے نم رکھنے والے غدود کو بلاک کر دیتے ہیں، جس سے آنکھوں میں شدید خارش، جلن، سوجن، چھلکے دار جلد اور بینائی کا دھندلا پن جیسے مسائل پیدا ہوتے ہیں۔ برطانيہ میں ہر ہفتے تقریباً 1 لاکھ 29 ہزار مصنوعی پلکیں لگوانے کے سیشنز ہوتے ہیں، جہاں مصنوعی ریشوں کے باریک تار گوند سے چپکائے جاتے ہیں۔ ماہرین نے متنبہ کیا ہے کہ مصنوعی پلکیں ان مائٹس کو قدرتی طور پر جھڑنے نہیں دیتیں اور ان کی تشخیص کو بھی مشکل بنا دیتی ہیں۔ ڈاکٹر ژمد نے مصنوعی پلکیں استعمال کرنے والوں کو ہدایت کی ہے کہ وہ دن میں دو بار مخصوص برش اور نرم کلینزر سے پلکوں کی صفائی کو یقینی بنائیں تاکہ شدید انفیکشن سے بچا جا سکے۔