امریکا کے ساتھ ممکنہ معاہدہ گرین لینڈ کی خودمختاری کو متاثر نہیں کرے گا، ڈنمارک

ڈنمارک اور گرین لینڈ نے اپنے مشترکہ بیان میں واضح کیا ہے کہ امریکا کے ساتھ ہونے والا متوقع عسکری معاہدہ گرین لینڈ کی خودمختاری کو بالکل متاثر نہیں کرے گا۔ ڈنمارک کے وزیرِ خارجہ لارس لوکے راسموسن نے کہا کہ اگلا ہفتہ گرین لینڈ، ڈنمارک اور امریکا کے لیے انتہائی مثبت ثابت ہو سکتا ہے۔ ان کے مطابق کئی ماہ سے جاری غیر یقینی صورتِ حال اب ایک ایسے دفاعی معاہدے کی شکل اختیار کر رہی ہے جو آرکٹک اور شمالی بحرِ اوقیانوس میں سیکیورٹی کو مضبوط بنانے کے ساتھ نیٹو اور یورپ کی اجتماعی سلامتی میں اضافہ کرے گا، جبکہ ڈنمارک کی مقرر کردہ حدود اور ریڈ لائنز کا مکمل احترام کیا جائے گا۔

یہ وضاحت امریکی صدر ڈونلڈ ٹرمپ کے اس دعوے کے بعد سامنے آئی ہے جس میں انہوں نے کہا تھا کہ یہ معاہدہ امریکا کو اس آرکٹک جزیرے کی سلامتی پر مستقل کنٹرول فراہم کر دے گا۔ واضح رہے کہ امریکا، ڈنمارک اور گرین لینڈ نے دو روز قبل گرین لینڈ میں امریکی عسکری موجودگی کو نمایاں طور پر بڑھانے کے معاہدے کا اعلان کیا تھا۔ اس معاہدے کے تحت امریکا کو جزیرے پر اہم عسکری تنصیبات قائم کرنے اور اپنی فوج بڑھانے کی اجازت ہو گی، اور توقع ہے کہ اس پر آئندہ ہفتے اقوامِ متحدہ کی جنرل اسمبلی کے اجلاس کے موقع پر باقاعدہ دستخط کیے جائیں گے۔