حوثی ملیشیا کا ریاض کی طرف داغا گیا بیلسٹک میزائل فضا میں ہی تباہ کر دیا گیا

سعودی عرب کی قیادت میں قائم عسکری اتحاد نے دعویٰ کیا ہے کہ یمن کے حوثی گروپ کی جانب سے ہفتے کی صبح سعودی دارالحکومت ریاض کی طرف داغا گیا بیلسٹک میزائل سعودی فضائی دفاعی نظام نے فضا میں ہی کامیابی سے تباہ کر دیا۔ سعودی اتحاد کے ترجمان میجر جنرل ترکی المالکی کے مطابق حوثی ملیشیا نے ریاض کے علاوہ بیش، طائف، فرسان اور ینبع میں بھی شہریوں اور ملکی بنیادی تنصیبات کو نشانہ بنانے کی کوشش کی، تاہم سعودی ایئر ڈیفنس نے بروقت کارروائی کرتے ہوئے تمام تر حملوں کو مکمل طور پر ناکام بنا دیا۔

عالمی خبر رساں اداروں کے مطابق ریاض میں حملے کے دوران شدید دھماکوں کی آوازیں سنی گئیں جبکہ کنگ خالد انٹرنیشنل ایئرپورٹ کے قریب دھوئیں کے بادل بھی دیکھے گئے، تاہم ان واقعات میں کسی قسم کے جانی نقصان کی اطلاع موصول نہیں ہوئی ہے۔ دوسری جانب حوثی عسکری ترجمان یحییٰ سریع نے دعویٰ کیا ہے کہ انہوں نے ریاض میں حساس مقامات اور ینبع میں سعودی آرامکو کی آئل تنصیبات کو ڈرونز اور میزائلوں سے نشانہ بنایا، تاہم حوثیوں نے اس دعوے کے حق میں کوئی شواہد پیش نہیں کیے ہیں۔ اس تازہ حملے کے بعد دونوں فریقین کے درمیان کشیدگی شدید ہو گئی ہے اور سعودی حکام نے ملک بھر میں دفاعی نظام کو ہائی الرٹ کر دیا ہے