سندھ حکومت کا ڈی پورٹ ہو کر واپس آنے والوں کی لازمی میڈیکل اسکریننگ کا فیصلہ

کراچی: سندھ حکومت نے بیرونِ ملک سے ڈی پورٹ ہو کر وطن واپس آنے والے افراد کی لازمی میڈیکل اسکریننگ کا فیصلہ کر لیا ہے۔ اس فیصلے کے تحت ایچ آئی وی، تپِ دق (ٹی بی) اور ہیپاٹائٹس بی و سی کے ٹیسٹ لازمی قرار دے دیے گئے ہیں۔

محکمہ صحت سندھ کے مطابق ہر سال تقریباً 50 ہزار پاکستانی مختلف ممالک سے ڈی پورٹ ہو کر واپس آتے ہیں، جبکہ جناح انٹرنیشنل ایئرپورٹ پر روزانہ 150 سے 200 ڈی پورٹیز کی آمد ہوتی ہے۔

حکام کا کہنا ہے کہ غیر تشخیص شدہ مریض معاشرے میں خطرناک بیماریوں کے پھیلاؤ کا سبب بن سکتے ہیں۔ ماضی میں ڈی پورٹ ہونے والے افراد بغیر کسی طبی معائنے کے گھروں کو روانہ ہو جاتے تھے، جس کے باعث بروقت تشخیص نہ ہونے سے متاثرہ افراد علاج سے محروم رہ جاتے تھے۔

محکمہ صحت کے مطابق لاعلمی کے باعث بیماری کے خاندان اور کمیونٹی میں منتقل ہونے کا خدشہ بڑھ جاتا ہے، اسی لیے لازمی اسکریننگ کا فیصلہ کیا گیا ہے تاکہ بروقت تشخیص اور علاج کو یقینی بنایا جا سکے اور متعدی امراض کے پھیلاؤ کو روکا جا سکے۔