وزیراعظم سے گیٹس فاؤنڈیشن کے وفد کی ملاقات، پولیو کے خاتمے، ڈیجیٹل ادائیگیوں پر گفتگو

اسلام آباد: وزیراعظم محمد شہباز شریف سے گیٹس فاؤنڈیشن کے ایک اعلیٰ سطحی وفد نے اسلام آباد میں ملاقات کی، جس میں فاؤنڈیشن کی نمائندگان کلپنا کوچر اور انیتا زیدی شامل تھیں۔ ملاقات میں پاکستان اور گیٹس فاؤنڈیشن کے درمیان صحت، مالیاتی شمولیت اور ترقیاتی شعبوں میں جاری دوطرفہ شراکت داری کو مزید مؤثر اور مستحکم بنانے پر تفصیلی تبادلہ خیال کیا گیا۔

وزیراعظم نے پاکستان میں مختلف ترقیاتی و قومی چیلنجز کے دوران گیٹس فاؤنڈیشن کی مسلسل معاونت کو سراہتے ہوئے کہا کہ ملک سے پولیو کا مکمل اور حتمی خاتمہ حکومت کی اعلیٰ ترین ترجیح ہے، اور اس قومی پروگرام کی نگرانی اعلیٰ ترین سطح پر کی جا رہی ہے۔ انہوں نے کہا کہ فاؤنڈیشن نے ہیلتھ کیئر، غذائیت، زچہ و نوزائیدہ بچے کی صحت اور کمزور طبقات کی بحالی کے لیے انتہائی قابل قدر کردار ادا کیا ہے۔ وزیراعظم نے واضح کیا کہ کیش لیس اکانومی حکومت کے بنیادی اصلاحاتی ایجنڈے کا اہم حصہ ہے۔ ڈیجیٹل ادائیگیوں کے فروغ سے جہاں عام شہریوں کی زندگیوں میں آسانی آئے گی، وہیں حکومتی نظام میں شفافیت آئے گی اور سرکاری رقوم بلا تاخیر مستحقین تک پہنچیں گی۔ حکومت اور گیٹس فاؤنڈیشن کے مشترکہ اقدامات کے نتیجے میں ڈیجیٹل فنانشل سروسز کے استعمال میں اضافہ ہو رہا ہے۔ وزیراعظم نے زور دیا کہ بینظیر انکم سپورٹ پروگرام سمیت تمام مالیاتی امداد براہِ راست اور باوقار طریقے سے مستحق خواتین کو مہیا کی جانی چاہیے تاکہ ان کی معاشی خود مختاری ممکن ہو سکے۔ ملاقات کے دوران غذائی تحفظ، غربت کا خاتمہ، عوامی صحت اور موسمیاتی تبدیلی جیسے چیلنجز سے نبرد آزما ہونے کے لیے گورننس ریفارمز پر بھی باہمی تعاون بڑھانے کا اعادہ کیا گیا۔