بنوں میں 8 ماہ کے بچے میں پولیو وائرس کی تصدیق

پشاور: خیبرپختونخوا کے ضلع بنوں سے پولیو وائرس کا ایک اور نیا کیس سامنے آ گیا ہے، جس کی تصدیق کے بعد ملک بھر میں انسدادِ پولیو کی مہمات پر تشویش کی لہر دوڑ گئی ہے۔

محکمہ صحت کے حکام کے مطابق بنوں کی تحصیل میریان سے تعلق رکھنے والے 8 ماہ کے ایک شیر خوار بچے میں پولیو وائرس کی موجودگی کا انکشاف ہوا ہے۔ نیشنل انسٹی ٹیوٹ آف ہیلتھ (این آئی ایچ) کی ریجنل ریفرنس لیبارٹری نے نمونوں کی جانچ کے بعد بچے میں وائرس کی باقاعدہ تصدیق کر دی ہے۔اس نئے کیس کے سامنے آنے کے بعد خیبرپختونخوا میں رواں سال رپورٹ ہونے والے پولیو کیسز کی تعداد بڑھ کر 3 ہو گئی ہے، جبکہ پاکستان بھر میں پولیو سے متاثرہ بچوں کی مجموعی تعداد 4 تک پہنچ گئی ہے۔

واقعے کے فوری بعد صحت کے متعلقہ حکام کی جانب سے متاثرہ علاقے میں انسدادِ پولیو کے ہنگامی اقدامات، سیمپلنگ اور مانیٹرنگ کی صورتِ حال کو مزید سخت اور مؤثر بنانے کی ہدایت جاری کر دی گئی ہے۔