پنجاب کے ڈی ایچ کیو ہسپتالوں میں ایم آر آئی کا منصوبہ مشروط طور پر منظور

حکومتِ پنجاب نے صوبے کے تمام ڈسٹرکٹ ہیڈکوارٹرز (ڈی ایچ کیو) ہسپتالوں میں ایم آر آئی (MRI) کی جدید سہولت فراہم کرنے کے لیے 6 ارب 23 کروڑ 25 لاکھ 90 ہزار روپے کے خطیر فنڈز سے تیار کردہ منصوبے کی مشروط منظوری دے دی ہے۔ منصوبے کی منظور کے ساتھ ہی متعلقہ حکام سے ہسپتال وار ایم آر آئی رپورٹ طلب کر لی گئی ہے۔ پلاننگ کمیٹی کی جانب سے نشاندہی کی گئی ہے کہ جمع کرائے گئے پی سی ون (PC-I) میں اضلاع کے اندر بیماریوں کے مجموعی بوجھ، مریضوں کے دیگر ہسپتالوں میں ریفرل کے رجحان اور ٹیسٹ کے لیے انتظار کے اوقات کی تفصیلی معلومات شامل نہیں تھیں، جنہیں فوری شامل کرنے کی ہدایت کی گئی ہے۔

محکمہ صحت کی جانب سے دی گئی تفصیلی بریفنگ میں انکشاف کیا گیا کہ فی الوقت پنجاب کے تمام ڈی ایچ کیو ہسپتالوں میں سے صرف بہاولنگر اور شیخوپورہ میں ہی ایم آر آئی کی سہولت دستیاب ہے۔ نئے منصوبے کے تحت جن اضلاع میں ایک سے زائد ڈی ایچ کیو ہسپتال واقع ہیں، وہاں کے صرف ایک مرکزی ہسپتال میں ایم آر آئی مشین نصب کی جائے گی۔ اس منصوبے میں ایک ایم آر آئی مشین کی تخمینی قیمت 8 لاکھ 50 ہزار امریکی ڈالر مقرر کی گئی ہے۔ مالی تخمینے کے مطابق طبی مشینری و آلات کے لیے 6 ارب 4 کروڑ 75 لاکھ روپے سے زائد، ضروری ڈسپوزایبل اشیا کے لیے 6 کروڑ 99 لاکھ روپے، ہسپتالوں میں معمولی تعمیراتی کاموں کے لیے 10 کروڑ 50 لاکھ روپے اور آئی ٹی انفراسٹرکچر کی بہتری کے لیے 1 کروڑ 8 لاکھ روپے کی رقم منظور کی گئی ہے۔