نیتن یاہو کی ٹرمپ کو ایران کیخلاف ناکہ بندی اور معاشی دباؤ پر مبارکباد

تل ابیب: اسرائیلی وزیراعظم بنیامین نیتن یاہو نے ایران کے خلاف سخت امریکی بحری ناکہ بندی اور شدید معاشی دباؤ کی پالیسی پر امریکی صدر ڈونلڈ ٹرمپ کو مبارکباد پیش کرتے ہوئے ایران کو دنیا بھر میں عدم استحکام اور تشدد کا سب سے بڑا ذریعہ قرار دیا ہے۔

اسرائیلی میڈیا کی رپورٹس کے مطابق نیتن یاہو نے سوشل میڈیا پلیٹ فارم ‘ایکس’ (سابقہ ٹوئٹر) پر جاری کردہ اپنے خصوصی بیان میں کہا کہ گزشتہ ایک سال کے عرصے میں امریکا اور اسرائیل کی مشترکہ اور اتحادی حکمتِ عملی نے تاریخی اور غیر معمولی پیش رفت حاصل کی ہے۔

 نیتن یاہو کے بقول تہران اور اس کے اتحادیوں پر مشتمل نام نہاد ‘بدی کا محور’ (Axis of Evil) عسکری و معاشی طور پر ماضی کے مقابلے میں کہیں زیادہ کمزور ہو چکا ہے، جبکہ اسرائیلی اور امریکی عوام اس مشترکہ جنگ میں صدر ٹرمپ کے ساتھ کھڑے ہیں۔ انہوں نے ایران کی معاشی ناکہ بندی، معاشی پابندیوں اور سمندری رکاوٹوں کو سراہتے ہوئے ان اقدامات پر امریکی صدر کو خصوصی خراجِ تحسین پیش کیا۔واضح رہے کہ ایران کے خلاف اس ہمہ گیر جنگ کا باقاعدہ آغاز 28 فروری 2026 کو اس وقت ہوا تھا جب امریکا اور اسرائیل نے سفارتی مذاکرات کی موجودگی کے باوجود تہران پر مشترکہ ہوائی حملے کیے تھے۔ابتدائی حملوں اور ایران کے جوابی وار کے بعد یہ تصادم پورے مشرقِ وسطیٰ میں پھیل گیا، جو بعد ازاں سخت ترین معاشی پابندیوں اور امریکی بحری ناکہ بندی کی شکل اختیار کر گیا۔