سندھ اسمبلی نے رینجرز کی تعیناتی میں مزید ایک سال کی توسیع کر دی

کراچی: سندھ اسمبلی نے صوبے میں امن و امان کی مجموعی صورتحال کے پیشِ نظر پاکستان رینجرز (سندھ) کی تعیناتی اور خصوصی اختیارات میں مزید ایک سال کی توسیع کی آئینی قرارداد کثرتِ رائے سے منظور کر لی ہے۔

منظور کی جانے والی آئینی قرارداد کے تحت سندھ بھر میں رینجرز کی باقاعدہ تعیناتی کی مدت میں 20 جولائی 2026 سے 19 جولائی 2027 تک کے لیے ایک سال کی توسیع کی منظوری دی گئی ہے۔ یہ فیصلہ آئینِ پاکستان کے آرٹیکل 147 کے تحت کیا گیا ہے، جس کی رو سے رینجرز صوبے میں سول انتظامیہ کی مدد اور پولیس کی معاونت کے لیے آئندہ ایک سال تک اپنے فرائض سرانجام دیتی رہے گی۔

 متن میں کہا گیا ہے کہ کراچی اور صوبے کے دیگر اضلاع میں ٹارگٹ کلنگ، اسٹریٹ کرائم اور سنگین نوعیت کی مجرمانہ سرگرمیوں میں واضح کمی رینجرز کے بر وقت آپریشنز اور تدارک کا نتیجہ ہے۔رینجرز نے پولیس کے ساتھ مل کر متعدد کامیاب انٹیلی جنس بیسڈ آپریشنز (IBOs) سرانجام دیے ہیں، جس سے امن و امان کی بحالی میں مدد ملی ہے۔متن کے مطابق کالعدم تنظیموں کی زیرِ زمین سرگرمیاں، کالعدم گروہ اور روپوش مفرور ملزمان بدستور سیکیورٹی کے لیے بڑا چیلنج اور خطرہ ہیں، جس کے پیشِ نظر عوامی جان و مال کے تحفظ کے لیے رینجرز کی موجودگی ناگزیر ہے۔