پٹرولیم لیوی کا پٹرول کی قیمت سے کوئی تعلق نہیں: حافظ نعیم الرحمٰن

اسلام آباد: امیرِ جماعت اسلامی حافظ نعیم الرحمٰن نے کہا ہے کہ پٹرولیم لیوی کا پٹرول کی اصل قیمت سے کوئی تعلق نہیں ہے، بلکہ ایک مخصوص مافیائی سسٹم کے تحت چند افراد کو نفع پہنچانے کے لیے عوام پر یہ بوجھ ڈالا جا رہا ہے۔

اسلام آباد میں ایک پریس کانفرنس سے خطاب کرتے ہوئے انہوں نے کہا کہ عام عوام نے اس ظالمانہ پٹرولیم لیوی کو ’بھتا ٹیکس‘ قرار دے دیا ہے۔ انہوں نے اعلان کیا کہ حکومت کی عوام دشمن پالیسیوں اور مہنگائی کے خلاف 20 ستمبر کو ملک بھر سے عوام اسلام آباد کی جانب مارچ کریں گے اور چاروں اطراف سے وفاقی دارالحکومت میں داخل ہوں گے۔

حافظ نعیم الرحمٰن کا کہنا تھا کہ اس وقت پورے ملک میں جماعت اسلامی کا احتجاجی تحرک پوری قوت کے ساتھ جاری ہے اور 36 اہم شہروں میں دھرنے دیے جا رہے ہیں۔

انہوں نے مزید بتایا کہ وہ آج تیمرگرہ کا دورہ کر رہے ہیں جہاں ایک بہت بڑا احتجاجی دھرنا منعقد کیا جا رہا ہے۔ ان کا کہنا تھا کہ حکومت کے خلاف عوام کا غصہ بڑھتا جا رہا ہے اور ہر گزرتے دن کے ساتھ جماعت اسلامی کے دھرنوں میں شہریوں کی شرکت اور تعداد میں نمایاں اضافہ ہو رہا ہے۔