ملائیشین وزیراعظم کا پاکستان پر دہشت گردی کا الزام ماننے سے صاف انکار

نئی دہلی: ملائیشیا کے وزیراعظم انور ابراہیم نے بھارتی میڈیا کو دیے گئے ایک انٹرویو کے دوران پاکستان پر بغیر ثبوت کے ریاستی دہشت گردی کا الزام لگانے کی بھارتی صحافی کی کوشش کو مکمل طور پر ناکام بنا دیا اور کسی بھی ایسے بیانیے کو تسلیم کرنے سے صاف انکار کر دیا۔

برکس (BRICS) اجلاس میں شرکت کے سلسلے میں بھارت میں موجود ملائیشین وزیراعظم انور ابراہیم سے انٹرویو کے دوران بھارتی اینکر نے مقبوضہ کشمیر کے علاقے پہلگام میں پیش آنے والے ایک واقعے کا حوالہ دیتے ہوئے پاکستان کو نشانہ بنانے اور اس پر ریاستی دہشت گردی کا لیبل چسپاں کرنے کی کوشش کی۔ تاہم، انور ابراہیم نے انتہائی محتاط اور سفارتی انداز اپنائے بغیر دوٹوک موقف اختیار کیا۔

ملائیشیا کے وزیراعظم نے واضح کیا کہ بطور وزیراعظم وہ صرف ان مصدقہ حقائق اور رپورٹس پر بات کر سکتے ہیں جو ان کے اپنے ملک کے سیکیورٹی اداروں کی جانب سے فراہم کی جاتی ہیں۔ انہوں نے کہا کہ ملائیشیا کے انٹیلی جنس اداروں اور متعلقہ حکام نے آج تک ایسی کوئی رپورٹ پیش نہیں کی جس سے یہ ثابت ہو سکے کہ پاکستان بھارت میں کسی قسم کی ریاستی دہشت گردی میں ملوث ہے۔

اس انٹرویو کے دوران ملائیشین وزیراعظم نے فلسطین پر اسرائیلی ناجائز قبضے اور غاصبانہ کارروائیوں کی بھی شدید الفاظ میں مذمت کی۔ انہوں نے فلسطینی عوام پر جاری اسرائیلی بمباری اور انسانی حقوق کی سنگین خلاف ورزیوں پر گہری تشویش کا اظہار کرتے ہوئے عالمی برادری سے مظلوم فلسطینیوں کی حمایت کا اعادہ کیا۔