پٹرولیم مصنوعات پر ریلیف: حکومت اور جماعت اسلامی کے مذاکرات منگل تک موخر

اسلام آباد: پٹرولیم مصنوعات کی بلند قیمتوں اور پٹرولیم لیوی میں کمی کے معاملے پر وفاقی حکومت اور جماعت اسلامی کے درمیان جاری مذاکرات میں تعطل برقرار ہے، جس کے باعث پیر کو ہونے والی اہم نشست اب منگل تک ملتوی کر دی گئی ہے۔

وزیراعظم شہباز شریف کی ہدایت پر وفاقی وزیر منصوبہ بندی احسن اقبال نے نائب امیر جماعت اسلامی لیاقت بلوچ سے رابطہ کر کے وزیراعظم کا پیغام پہنچایا۔ لیاقت بلوچ نے تصدیق کی کہ احسن اقبال نے انہیں آگاہ کیا کہ وزیراعظم چاہتے ہیں کہ پٹرولیم لیوی اور دیگر مطالبات پر تفصیلی بات چیت اب منگل کو کی جائے۔

لیاقت بلوچ کے مطابق، حکومت نے جماعت اسلامی کے مطالبات کا جائز لینے کے لیے ایک مرکزی کمیٹی قائم کر رکھی ہے، جبکہ پٹرولیم لیوی اور انڈیپنڈنٹ پاور پروڈیوسرز (IPPs) کے معاہدوں کے لیے الگ الگ ذیلی کمیٹیاں تشکیل دی گئی ہیں۔ طے شدہ نئے شیڈول کے تحت پٹرولیم لیوی پر مذاکرات منگل کو ہوں گے جبکہ آئی پی پیز کے معاملے پر بدھ کو پیش رفت کا جائزہ لیا جائے گا۔

واضح رہے کہ اس سے قبل اسلام آباد میں حکومت اور جماعت اسلامی کے درمیان پٹرولیم لیوی میں کمی اور عوام کو فوری ریلیف کی فراہمی پر مذاکرات کے دو دور ہو چکے ہیں، تاہم دونوں فریقین کے درمیان کسی حتمی نتیجے یا معاہدے پر اتفاق رائے نہیں ہو سکا۔

دوسری جانب جماعت اسلامی نے حکومت پر دباؤ برقرار رکھتے ہوئے 20 ستمبر کو وفاقی دارالحکومت اسلام آباد کی طرف لانگ مارچ اور دھرنے کی کال دے رکھی ہے، جس کا مقصد پٹرولیم لیوی کے خاتمے اور بجلی کے بھاری بلوں سے عوام کو نجات دلانا ہے۔