ہرنائی میں پاک فوج کا بروقت ریسکیو آپریشن، 5 کان کن زندہ نکال لیے

ہرنائی: بلوچستان کے ضلع ہرنائی میں واقع کوئلہ کان میں اچانک گیس دھماکے کے بعد پھنس جانے والے 5 مزدوروں کو پاک فوج نے کامیاب اور بروقت ریسکیو آپریشن کے ذریعے زندہ بچا لیا ہے۔

ذرائع کے مطابق، ہرنائی کے پہاڑی علاقے میں قائم کوئلہ کان کے اندر زہریلی گیس کا شدید دھماکہ ہوا جس کے نتیجے میں متعدد کان کن اندر گہرائی میں پھنس کر رہ گئے۔ حادثے کی اطلاع ملتے ہی پاک فوج نے فوری طور پر امدادی کارروائی کا آغاز کیا۔

ذرائع نے بتایا کہ حادثے کے نتیجے میں 4 کان کن دم گھٹنے اور ملبے تلے دبنے سے جاں بحق ہو گئے، جبکہ 5 زخمیوں کو بحفاظت نکال کر فوری طبی امداد فراہم کی گئی۔ ریسکیو ٹیموں کی جانب سے ریسکیو آپریشن مکمل کر لیا گیا ہے اور شدید زخمی کان کنوں کو بہتر علاج معالجے کے لیے کوئٹہ کے ہسپتال منتقل کر دیا گیا ہے۔

دوسری جانب، مقامی آبادی اور متاثرہ خاندانوں نے کٹھن حالات میں پاک فوج کی جانب سے بروقت، جرات مندانہ اور تیز رفتار امدادی کارروائی پر گہرے تشکر کا اظہار کرتے ہوئے ان کی خدمات کو خراج تحسین پیش کیا ہے۔