ہیپاٹائٹس سی کے مریض ایک کروڑ 10 لاکھ سے تجاوز، اسلام آباد سے ملک گیر اسکریننگ پروگرام شروع

پاکستان میں ہیپاٹائٹس سی کے خوفناک حد تک پھیلاؤ کا انکشاف ہوا ہے، جس کے تحت ملک بھر میں اس موذی مرض میں مبتلا افراد کی تعداد 1 کروڑ 10 لاکھ سے تجاوز کر گئی ہے۔ اس سنگین صورتِ حال پر قابو پانے کے لیے ‘وزیراعظم انسدادِ ہیپاٹائٹس پروگرام’ کے ڈائریکٹر ڈاکٹر ضیا داوڑ نے ’سماء‘ سے گفتگو کرتے ہوئے بتایا کہ ملک گیر ہیپاٹائٹس سی اسکریننگ پروگرام کا باقاعدہ آغاز وفاقی دارالحکومت اسلام آباد سے کر دیا گیا ہے، جس کے تحت 12 سال سے زائد عمر کے ہر شہری کی اسکریننگ کا ہدف مقرر کیا گیا ہے۔

ڈاکٹر ضیا داوڑ کے مطابق اس قومی مہم کے تحت ملک بھر میں مجموعی طور پر 16 کروڑ جبکہ اسلام آباد میں تقریباً 17 لاکھ افراد کی اسکریننگ کی جائے گی، جس میں تمام وفاقی ملازمین کے ٹیسٹ بھی شامل ہیں۔ انہوں نے بتایا کہ پروگرام کے تین اہم مراحل میں اسکریننگ، تصدیقی ٹیسٹنگ اور مکمل علاج شامل ہیں، اور ان تمام مرحلوں کے تمام تر اخراجات وفاقی حکومت خود برداشت کرے گی۔ فی مریض اسکریننگ اور ٹیسٹنگ پر ساڑھے 7 ہزار روپے جبکہ علاج پر تقریباً 64 ہزار روپے کا تخمینہ لگایا گیا ہے۔ انہوں نے مزید بتایا کہ ہوائی اڈوں پر مسافروں کی اسکریننگ کی جائے گی اور 18 سرکاری اسپتالوں میں یہ سہولیات فعال کر دی گئی ہیں، جبکہ ٹیسٹ نہ کرانے والے وفاقی ملازمین کی تنخواہیں روکنے کی سفارش بھی زیرِ غور ہے۔