دو بار کا عالمی چیمپئن باکسر آغا کلیم چائے بیچنے پر مجبور، ویڈیو بھی شیئر کر دی

پاکستان کے نامور کک باکسر اور دو بار کے عالمی چیمپئن آغا کلیم نے انکشاف کیا ہے کہ عالمی سطح پر ملک کا نام روشن کرنے اور متعدد بین الاقوامی اعزازات حاصل کرنے کے باوجود وہ روزگار کے لیے چائے فروخت کرنے پر مجبور ہیں۔ کوئٹہ سے تعلق رکھنے والے اور کراچی میں مقیم آغا کلیم، جو کئی بار ایشیائی اور بین الاقوامی مقابلوں میں پاکستان کے لیے تمغے جیت چکے ہیں، نے سوشل میڈیا پلیٹ فارم ‘ایکس’ پر نجی چینل کو دیے گئے اپنے ایک پرانے انٹرویو کا کلپ دوبارہ شیئر کیا ہے۔ ان کا کہنا ہے کہ مستقل مالی تعاون، سرکاری یا نجی اسپانسرشپ نہ ہونے کے باعث انہیں اپنی گزر بسر کے لیے چائے کا اسٹال چلانا پڑ رہا ہے۔ انہوں نے افسوس کا اظہار کیا کہ شدید معاشی مشکلات کے باوجود انہوں نے چائے کے اسٹال پر کام کے ساتھ ساتھ بین الاقوامی مقابلوں میں کامیابیاں حاصل کیں، اور اگر حکومت یا نجی ادارے ان کی مناسب سرپرستی اور مالی معاونت کریں تو وہ ملک کے لیے مزید عالمی اعزازات جیت سکتے ہیں۔