امریکا نے ڈیل کے تحت کیےگئے وعدے پورے نہ کیے تو مفاہمتی یادداشت پر عمل ترک کردیں گے: ایران

اقوام متحدہ میں ایران کے مستقل مندوب اور سفیر امیر سعید ایروانی نے امریکا کو سخت خبردار کرتے ہوئے کہا ہے کہ اگر واشنگٹن نے حالیہ ڈیل کے تحت اپنے وعدے پورے نہ کیے تو ایرانی حکومت باہمی مفاہمتی یادداشت (MoU) پر عمل درآمد فوری طور پر ترک کر دے گی۔ اقوام متحدہ کی سلامتی کونسل کے باہر میڈیا نمائندوں سے گفتگو کرتے ہوئے امیر سعید ایروانی نے 7 اور 8 جولائی کو ایرانی جزائر اور جنوبی شہروں پر امریکی عسکری حملوں کی شدید مذمت کی اور انہیں اقوام متحدہ کے چارٹر اور باہمی مفاہمتی یادداشت کی صریحاً خلاف ورزی قرار دیا۔ انہوں نے واضح الفاظ میں مؤقف اختیار کیا کہ ایران اب تک معاہدے کی پاسداری کرتا آیا ہے، لیکن اگر امریکا کی جانب سے ان جارحانہ خلاف ورزیوں کا سلسلہ جاری رہا تو ایران بھی اس ڈیل کے تحت اپنی بین الاقوامی ذمہ داریاں اور وعدے پورا کرنے کا پابند نہیں رہے گا۔