امریکا: نو دریافت شدہ قدیم باقیات امریکی تاریخ بدل سکتی ہیں

امریکی ریاست کیلیفورنیا کے ساحل سے کچھ فاصلے پر واقع چینل آئی لینڈز میں ملنے والے قدیم انسانی آثار نے براعظم امریکا میں پہلی انسانی آبادکاری سے متعلق صدیوں پرانے روایتی نظریات کو بدل کر رکھ دیا ہے۔ غیر ملکی میڈیا کے مطابق، ان جزائر پر تحقیق کے دوران تقریباً 13 ہزار سال پرانی انسانی باقیات، قدیم بستیاں اور دیگر نوادرات دریافت ہوئے ہیں، جن کی بنیاد پر ماہرینِ آثارِ قدیمہ یہ امکان ظاہر کر رہے ہیں کہ امریکا کے اولین باشندے خشکی کے راستے کے بجائے کشتیوں کے ذریعے سمندری سفر کرتے ہوئے یہاں پہنچے تھے۔ یہ نئی دریافت اس روایتی سائنسی تصور کو براہِ راست چیلنج کرتی ہے جس کے مطابق ابتدائی انسان سائبیریا سے زمینی پل (لینڈ برج) عبور کر کے مغربی کینیڈا کے برفیلے راستوں سے براعظم امریکا میں داخل ہوئے تھے۔ تحقیقی ماہرین کا کہنا ہے کہ چینل آئی لینڈز سے ملنے والے شواہد ساحلی راستوں سے شمالی امریکا پہنچنے کے نظریے کو مضبوط بناتے ہیں، تاہم اس کی حتمی تصدیق کے لیے مزید گہرائی سے تحقیق اور شواہد کی ضرورت ہے۔