امریکی افواج نے حملوں کا نیا سلسلہ شروع کر دیا، ایران کے مختلف علاقوں میں دھماکوں کی آوازیں

امریکی سینٹرل کمانڈ (سینٹکام) نے ایران کے اندر اور آبنائے ہرمز کے اطراف میں فوجی اہداف کے خلاف حملوں کے ایک نئے سلسلے کا باضابطہ اعلان کر دیا ہے۔ امریکی حکام کے مطابق یہ کارروائی پاسدارانِ انقلاب کی جانب سے قبرص کے پرچم بردار ایک تجارتی کنٹینر جہاز پر مبینہ حملے کے بعد صدر کی ہدایت پر کی گئی ہے۔ اس مبینہ حملے کے نتیجے میں جہاز کے انجن روم کو شدید نقصان پہنچا، آگ بھڑک اٹھی اور عملے کا ایک رکن لاپتہ ہو گیا۔ سینٹکام کا مؤقف ہے کہ ایران کو ماضی میں طے شدہ مفاہمتی یادداشتوں پر عمل کرنے کے متعدد مواقع دیے گئے مگر تہران اپنا رویہ بدلنے میں ناکام رہا۔ دوسری جانب، ایرانی سرکاری میڈیا اور مہر خبر رساں ادارے نے تصدیق کی ہے کہ ایران کے جنوبی شہر چابہار کے قریب، خلیج فارس کے جزیرہ قشم، بوشہر اور عسلویہ میں زوردار دھماکوں کی آوازیں سنی گئی ہیں۔ ابھی تک ایرانی حکام کی جانب سے ان حملوں کی نوعیت اور نقصانات کے حوالے سے کوئی حتمی یا تفصیلی بیان جاری نہیں کیا گیا ہے