یورپ کی آبنائے ہرمز پر جہازوں سے ’رضاکارانہ‘ نیویگیشن فیس لینے کی تجویز

آبنائے ہرمز میں بڑھتی ہوئی کشیدگی اور عالمی جہاز رانی کو درپیش خطرات کے پیش نظر یورپی اور خلیجی ممالک ایک نئے انتظامی ماڈل پر غور کر رہے ہیں۔ برطانوی اخبار گارڈین کے مطابق، آبنائے ملاکا کی طرز پر آبنائے ہرمز سے گزرنے والے بحری جہازوں سے لازمی ٹول ٹیکس کے بجائے رضاکارانہ بنیادوں پر نیویگیشن فیس وصول کرنے کی تجویز سامنے آئی ہے۔ برطانیہ کے نائب وزیراعظم ڈیوڈ لیمی نے خبردار کیا ہے کہ لازمی ٹول ٹیکس کے عالمی تجارت اور توانائی کی منڈی پر سنگین اثرات مرتب ہوں گے۔ سفارتی ذرائع کے مطابق عمان نے اس سلسلے میں ایک قانونی فریم ورک تیار کیا ہے، جبکہ قطر نے واضح کیا ہے کہ ایران کو اس آبی گزرگاہ پر یکطرفہ اختیار نہیں دیا جا سکتا۔ دوسری جانب، لندن میں بین الاقوامی میری ٹائم آرگنائزیشن کے اجلاس میں ایران کے خلاف پیش کی گئی قرارداد کی روس اور چین نے مخالفت کی ہے۔ اسی دوران، امریکی صدر ڈونلڈ ٹرمپ نے ایران کے ساتھ عارضی جنگ بندی کے خاتمے کا اعلان کرتے ہوئے سخت دھمکی دی ہے کہ کسی بھی حملے کی صورت میں امریکا ایک ہزار میزائل استعمال کرنے کے لیے تیار ہے۔ جواب میں ایران کے نئے سپریم لیڈر مجتبیٰ خامنہ ای نے اپنے پہلے تحریری بیان میں سابق سپریم لیڈر آیت اللہ علی خامنہ ای کی ہلاکت کا بدلہ لینے کے غیر متزلزل عزم کا اظہار کیا ہے۔