گندم کی کوئی قلت نہیں، قیمتوں میں مصنوعی اضافہ، ذخیرہ اندوزی کے خلاف کارروائی ہوگی، وفاقی وزیر

وفاقی وزیر برائے قومی غذائی تحفظ و تحقیق رانا تنویر حسین نے واضح کیا ہے کہ ملک میں گندم کی کوئی قلت نہیں ہے اور قیمتوں میں مصنوعی اضافے سمیت ذخیرہ اندوزی میں ملوث عناصر کے خلاف سخت قانونی کارروائی کی جائے گی۔ اے پی پی کی رپورٹ کے مطابق، وفاقی وزیر کی زیرِ صدارت وہیٹ بورڈ کا نواں اجلاس منعقد ہوا، جس میں چاروں صوبوں کے چیف سیکریٹریز، سیکریٹریز زراعت و خوراک اور فلور ملز ایسوسی ایشن کے نمائندوں نے شرکت کی۔ اجلاس میں وفاقی وزیر نے ایک حوصلہ افزا پیش رفت کا انکشاف کرتے ہوئے بتایا کہ رواں سال پاکستان میں گندم کی متوقع پیداوار گزشتہ سال کے مقابلے میں تقریباً 13 لاکھ 60 ہزار میٹرک ٹن زیادہ رہنے کا تخمینہ ہے، جس سے ملک میں گندم کا ہدف کامیابی سے حاصل کر لیا گیا ہے۔ صوبائی نمائندوں نے تصدیق کی کہ تمام علاقوں میں گندم کے وافر ذخائر موجود ہیں۔ رانا تنویر حسین نے صوبائی حکومتوں کو مارکیٹ کی مسلسل نگرانی اور مؤثر مینجمنٹ کی ہدایت کرتے ہوئے اس عزم کا اعادہ کیا کہ عوام کے مفادات کا تحفظ اولین ترجیح ہے اور صارفین کو مناسب قیمتوں پر گندم کی بلا تعطل فراہمی کے لیے تمام انتظامی اور قانونی اقدامات بروئے کار لائے جائیں گے۔