گوادر پورٹ میں نئی تاریخ رقم، پہلی بار بین الاقوامی جہازوں کو ایندھن کی فراہمی

پاکستان کی بحری معیشت (بلیو اکانومی) کے لیے ایک تاریخی سنگِ میل عبور کرتے ہوئے گوادر پورٹ پر پہلی بار بین الاقوامی بحری جہاز کو مقامی سطح پر ایندھن فراہم کر دیا گیا ہے۔ نیشنل لاجسٹکس کارپوریشن (این ایل سی) نے عالمی توانائی کمپنی وائیٹول کے تعاون سے گوادر پورٹ پر پہلا کامیاب بنکرنگ آپریشن مکمل کیا، جس کے دوران متحدہ عرب امارات کے ایل این جی جہاز (ENUGU) کو 2 ہزار 500 میٹرک ٹن بین الاقوامی معیار کا ویری لو سلفر فیول آئل (VLSFO) فراہم کیا گیا۔ اس تاریخی آپریشن کی خاص بات یہ ہے کہ یہ ایندھن پاکستان کی مقامی ریفائنری “Cnergyico PK Limited” میں تیار کیا گیا ہے، جو ملکی پیداواری صلاحیت کا واضح ثبوت ہے۔ ماہرین اور تجزیہ کاروں کے مطابق، خطے میں جاری جغرافیائی و سیاسی کشیدگی کے تناظر میں اس کامیابی سے گوادر بندرگاہ عالمی تجارتی جہازوں کے لیے ایک محفوظ، مؤثر اور قابلِ اعتماد بنکرنگ ہب بن کر ابھری ہے۔ اس پیش رفت سے نہ صرف بندرگاہی سرگرمیوں کو فروغ ملے گا بلکہ غیر ملکی سرمایہ کاری اور ٹرانزٹ ٹریڈ کے نئے مواقع بھی پیدا ہوں گے۔