کراچی، موچکو پولیس نے موٹر سائیکل سوار باپ اور بیٹے کو کچلنے والے ٹرک ڈرائیور کو گرفتار کرلیا

کراچی کے علاقے موچکو میں انویسٹی گیشن ڈسٹرکٹ کیماڑی پولیس نے دو مختلف کامیاب کارروائیاں کرتے ہوئے اہم ملزمان کو گرفتار کر لیا ہے۔ ترجمان پولیس کے مطابق، پہلی کارروائی میں موچکو انویسٹی گیشن پولیس نے گزشتہ ماہ 26 جون کو سپارکو روڈ پر موٹر سائیکل سوار باپ عبدالحمید اور بیٹے عبدالجبار کو کچل کر ہلاک کرنے والے مفرور ٹرک ڈرائیور اصغر علی کو گرفتار کر کے حادثے کا ذمہ دار ٹرک قبضے میں لے لیا ہے۔ پولیس نے نامعلوم گاڑی کے خلاف درج مقدمے کی تفتیش تکنیکی بنیادوں پر آگے بڑھاتے ہوئے مفرور ملزم کا سراغ لگایا۔ دوسری کارروائی کے دوران پولیس نے مواچھ گوٹھ میں دکانوں کے تالے توڑنے کی وارداتوں میں ملوث انتہائی مطلوب ملزم فیضان عرف ‘کٹر’ کو دھر لیا۔ ملزم فیضان نے 27 جون کی رات عائشہ مسجد کے قریب ایک دکان کے تالے توڑ کر 50 ہزار روپے نقدی، قیمتی موبائل فون اور اصل تعلیمی اسناد چوری کی تھیں، جس کا مقدمہ موچکو تھانے میں درج تھا۔ پولیس کی جانب سے دونوں گرفتار ملزمان سے مزید تفتیش اور قانونی کارروائی کا عمل جاری ہے۔