بلوچستان میں تاریخی انتظامی اصلاحات، 4 نئے ڈویژن اور 5 نئے اضلاع قائم

بلوچستان حکومت نے صوبے کے انتظامی ڈھانچے میں بڑے پیمانے پر اصلاحات کی منظوری دیتے ہوئے 4 نئے ڈویژن، 5 نئے اضلاع سمیت متعدد نئی سب ڈویژنز، تحصیلیں اور سب تحصیلیں قائم کر دی ہیں۔ محکمہ ریونیو کی جانب سے جاری نوٹیفکیشن کے مطابق، ان انقلابی تبدیلیوں کے بعد بلوچستان میں ڈویژنز کی تعداد 7 سے بڑھ کر 11 اور اضلاع کی تعداد 36 سے بڑھ کر 41 ہو گئی ہے۔ بلوچستان لینڈ ریونیو ایکٹ 1967 کے تحت موجودہ ضلع کوئٹہ کو ریلوے ٹریک کی بنیاد پر ‘کوئٹہ ایسٹ’ اور ‘کوئٹہ ویسٹ’ میں تقسیم کر دیا گیا ہے۔ مزید برآں، قلات ڈویژن کو ختم کر کے اس کی جگہ خضدار اور لسبیلہ کے نئے ڈویژنز بنائے گئے ہیں، جبکہ سابقہ سبی ڈویژن کا نام تبدیل کر کے ‘سیوی ڈویژن’ رکھ دیا گیا ہے۔ وڈھ اور تمپ کو بھی نئے اضلاع کا درجہ دے دیا گیا ہے جبکہ کوہ سلیمان کے نام سے نیا ڈویژن بھی قائم کیا گیا ہے۔ صوبائی حکومت نے بورڈ آف ریونیو کو ہدایت کی ہے کہ نئی انتظامی تقسیم اور حد بندیوں پر ایک ماہ کے اندر عملدرآمد مکمل کیا جائے۔ حکام کا کہنا ہے کہ ان اصلاحات کا مقصد عوام کو سرکاری خدمات کی بہتر فراہمی اور مقامی سطح پر گورننس کے نظام کو مضبوط بنانا ہے۔