کراچی، فائرنگ کے واقعات میں خاتون سمیت 2 افراد زخمی

کراچی کے مختلف علاقوں میں فائرنگ کے واقعات میں خاتون سمیت دو افراد زخمی ہو گئے ہیں۔ ریسکیو حکام کے مطابق، پہلا واقعہ بلدیہ ٹاؤن 7 نمبر کالا خان چوک کے قریب پیش آیا، جہاں گھر کے اندر نامعلوم سمت سے آنے والی اندھی گولی لگنے سے 40 سالہ خاتون گلناز زخمی ہو گئیں۔ چھیپا کے رضا کاروں نے فوری کارروائی کرتے ہوئے خاتون کو، جن کی ٹانگ پر گولی لگی تھی، طبی امداد کے لیے سول اسپتال منتقل کیا۔ پولیس نے واقعے کی تحقیقات شروع کر دی ہیں۔ دوسری جانب، سرجانی ٹاؤن کے علاقے حاجی صدیق گوٹھ عیدگاہ کے قریب ذاتی جھگڑے کے دوران فائرنگ کے نتیجے میں 30 سالہ اختر نامی شخص زخمی ہو گیا۔ سرجانی پولیس کے مطابق، زخمی نوجوان کو فوری طور پر عباسی شہید اسپتال منتقل کیا گیا جہاں اسے طبی امداد فراہم کی جا رہی ہے، جبکہ واقعے میں ملوث عناصر کے خلاف تفتیش کا عمل جاری ہے۔