چین میں سمندری طوفان باوی کا دوسرا وار، لاکھوں افراد نقل مکانی پر مجبور، پروازیں اور ٹرینیں معطل

چین ایک بار پھر شدید موسمی بحران کی زد میں آ گیا ہے جہاں طاقتور سمندری طوفان ‘باوی’ نے ملک کے مشرقی ساحلی علاقوں میں لینڈ فال کر لیا ہے۔ رپورٹس کے مطابق، ایک ہفتے کے دوران چین سے ٹکرانے والے اس دوسرے بڑے طوفان کا پھیلاؤ تقریباً ایک ہزار کلومیٹر تک ہے، جو فرانس کے مجموعی رقبے کے برابر بنتا ہے۔ طوفان نے پہلے ساحلی شہر تائی ژو اور بعد ازاں رات گئے وین ژو کے قریب لینڈ فال کیا۔ اگرچہ طوفان کی شدت کم ہو کر کیٹیگری ون رہ گئی ہے، تاہم اس کے ساتھ موجود نمی کے باعث موسلا دھار بارشوں، سیلاب اور لینڈ سلائیڈنگ کا شدید خطرہ برقرار ہے۔ چینی حکام نے مشرقی ژی جیانگ اور شمال مشرقی فوجیان صوبوں میں ریڈ الرٹ جاری کرتے ہوئے صرف ژی جیانگ سے 17 لاکھ سے زائد افراد کو محفوظ مقامات پر منتقل کیا ہے۔ طوفان کے باعث اسکول، دفاتر اور کاروباری سرگرمیاں معطل ہیں جبکہ 400 سے زائد پروازیں اور ٹرین سروسز منسوخ کر دی گئی ہیں۔ واضح رہے کہ چین پہنچنے سے قبل اس طوفان نے جاپان کے جزائر کو متاثر کیا تھا جبکہ فلپائن میں اس کے نتیجے میں ہونے والی لینڈ سلائیڈنگ سے 17 افراد ہلاک ہو چکے ہیں