دریائے سندھ پاکستان کی شہ رگ اور سندھ کی روح ہے، اس پر جارحیت ملک پر جارحیت ہوگی، مراد علی شاہ

وزیراعلیٰ سندھ سید مراد علی شاہ نے بھارت کی جانب سے سندھ طاس معاہدے کو یک طرفہ طور پر معطل یا منسوخ کرنے کی کوشش کی شدید الفاظ میں مذمت کرتے ہوئے اسے بین الاقوامی قوانین، معاہداتی ذمہ داریوں اور سرحد پار دریاؤں کے مسلمہ اصولوں کی کھلی خلاف ورزی قرار دیا ہے۔ اپنے ایک بیان میں وزیراعلیٰ سندھ نے واضح کیا کہ سندھ طاس معاہدہ کوئی سیاسی بندوبست نہیں جسے کسی بھی حکومت کی مرضی پر ختم کیا جا سکے، بلکہ یہ ایک پابند بین الاقوامی معاہدہ ہے جو دہائیوں کی علاقائی کشیدگی کے باوجود برقرار رہا ہے۔ انہوں نے کہا کہ دریائے سندھ پاکستان کی شہ رگ اور سندھ کی روح ہے اور پانی کو سیاسی ہتھیار کے طور پر استعمال کرنے کی کوئی بھی کوشش ملک کے امن و استحکام اور لاکھوں لوگوں کے روزگار کے لیے خطرہ ہے۔ مراد علی شاہ نے پاکستان پیپلز پارٹی کے عزم کو دہراتے ہوئے کہا کہ چیئرمین بلاول بھٹو زرداری کا نعرہ ”مرسوں مرسوں، سندھو نہ ڈیسوں“ ہر پاکستانی کے جذبات کی ترجمانی کرتا ہے۔ انہوں نے وفاقی حکومت پر زور دیا کہ وہ تمام سفارتی و قانونی راستے اختیار کرتے ہوئے اس معاملے کو عالمی فورمز پر اٹھائے، اور عالمی برادری سے بھی اپیل کی کہ وہ پانی کو سیاسی دباؤ کے آلے کے طور پر استعمال کرنے کی بھارتی کوششوں کو مسترد کرے۔