برطانیہ سے علیحدگی کی مہم تیز، سکاٹ لینڈ، ویلز اور شمالی آئرلینڈ کا آزادی کا مطالبہ

برطانیہ سے علیحدگی کی مہم میں اس وقت ایک بڑی تاریخی پیشرفت سامنے آئی ہے جب اسکاٹ لینڈ، ویلز اور شمالی آئرلینڈ کے قوم پرست رہنماؤں نے باضابطہ طور پر حقِ خودارادیت کے ایک مشترکہ اعلامیے پر دستخط کر دیے ہیں۔ غیر ملکی خبر ایجنسی کے مطابق، ویلز کے دارالحکومت کارڈف میں تینوں خطوں کے قوم پرست رہنماؤں کا ایک اہم اور اعلیٰ سطحی اجلاس منعقد ہوا، جس میں مملکتِ متحدہ (یو کے) سے الگ ہو کر اپنی اقوام کے مستقبل کا فیصلہ خود کرنے کے عزم کا اعادہ کیا گیا۔

مشترکہ اعلامیے میں بریگزٹ پر شدید تنقید کرتے ہوئے کہا گیا ہے کہ برطانیہ کے یورپی یونین سے نکلنے کے فیصلے نے ان تینوں خطوں کی معیشتوں کو سخت نقصان پہنچایا اور مقامی عوام کے لیے روزگار و ترقی کے مواقع محدود کر دیے ہیں۔ اعلامیے میں لندن میں قائم مرکزی برطانوی پارلیمنٹ کو آڑے ہاتھوں لیتے ہوئے واضح کیا گیا کہ “ویسٹ منسٹر کی حکمرانی کا وقت اب ختم ہونے کے قریب ہے”، اور کسی بھی مرکزی حکومت کو یہ حق حاصل نہیں کہ وہ جمہوری عمل کو روکے یا ان اقوام کے اپنے مستقبل کا خود انتخاب کرنے کے بنیادی حق کو کمزور کرے۔

تینوں خطوں کے رہنماؤں نے مشترکہ طور پر برطانوی حکومت سے مطالبہ کیا ہے کہ وہ آئینی تبدیلی کے متوقع عمل میں روڑے اٹکانے کے بجائے آئندہ کی منصوبہ بندی اور پرامن منتقلی کے لیے سہولت فراہم کرے۔ قوم پرست رہنماؤں کی اس متحدہ پیشرفت کو برطانیہ کی سالہا سال پرانی یونین کے لیے ایک سنگین اور بے مثال آئینی چیلنج قرار دیا جا رہا ہے۔