سہیل آفریدی کو کسی نے گرفتار نہیں کیا، خود پولیس وین میں بیٹھے: عظمیٰ بخاری

پنجاب کی وزیر اطلاعات عظمیٰ بخاری نے دعویٰ کیا ہے کہ وزیراعلیٰ خیبر پختونخوا سہیل آفریدی کو پنجاب پولیس نے گرفتار نہیں کیا بلکہ وہ خود رضا کارانہ طور پر پولیس کی گاڑی میں جا کر بیٹھے تھے۔ ایک نجی ٹی وی پروگرام میں گفتگو کرتے ہوئے عظمیٰ بخاری نے کہا کہ سہیل آفریدی بار بار پولیس اہلکاروں کو اکسانے اور جھگڑا کرنے کی کوشش کرتے رہے، تاہم پولیس کی جانب سے بدتمیزی اور گالم گلوچ کے باوجود انہیں مکمل پروٹوکول فراہم کیا گیا، اور وہ مسکراتے ہوئے پولیس وین میں جا کر بیٹھ گئے۔

عظمیٰ بخاری نے اس واقعہ کو محض “ٹوٹل ڈرامے بازی” قرار دیتے ہوئے کہا کہ اگر واقعی گرفتاری ہوتی تو وین میں پولیس اہلکار موجود ہوتے، جبکہ ان کے اپنے سوشل میڈیا کا نمائندہ اندر کی ویڈیو بھی بناتا رہا۔ انہوں نے وضاحت کی کہ ہجوم کے حملے کے خدشے کے باعث ڈرائیور نے گاڑی کو آگے بڑھایا اور کچھ دور جا کر روک دیا۔ صوبائی وزیر نے مزید کہا کہ لاہور ایک پرامن شہر ہے جہاں کے پی کے وزیراعلیٰ اب بھی بغیر سیکیورٹی گھوم رہے ہیں، جبکہ خیبر پختونخوا میں انہیں ایک کلومیٹر بھی پولیس کے بغیر چل کر دکھانا چاہیے۔