پبلک چارج قانون میں توسیع پر ٹرمپ انتظامیہ کے خلاف عدالت سے رجوع: نیویارک سٹی کی قیادت میں امریکی شہروں کا مقدمہ دائر

نیویارک سٹی نے امریکا کے متعدد دیگر بڑے شہروں کے ساتھ مل کر ٹرمپ انتظامیہ کے گرین کارڈ کے حوالے سے نئے ‘پبلک چارج’ قانون کے خلاف مینہیٹن کی وفاقی عدالت میں مقدمہ دائر کر دیا ہے۔ نیویارک کے میئر زوہران ممدانی نے اعلان کیا کہ شکاگو، سان فرانسسکو، سیئٹل اور واشنگٹن ڈی سی سمیت دیگر مقامی حکومتوں کے ساتھ مل کر 108 صفحات پر مشتمل درخواست دائر کی گئی ہے، جس میں 18 ستمبر سے نافذ ہونے والے اس نئے قانون اور یو ایس سی آئی ایس (USCIS) کی نئی گائیڈ لائنز کو غیر قانونی قرار دے کر فوری طور پر منسوخ کرنے کی استدعا کی گئی ہے۔

نئے وفاقی قواعد و ضوابط کے تحت، امریکی امیگریشن حکام کو یہ اختیار دیا گیا ہے کہ وہ گرین کارڈ کی درخواستوں پر فیصلہ کرتے وقت اس بات کا جائزہ لیں کہ آیا درخواست دہندہ نے میڈیکل، ہاؤسنگ، فوڈ سٹیمپ (راشن)، ڈگریز کے لیے تعلیمی مالی امداد یا کسی بھی قسم کی سرکاری مراعات کا استعمال کیا ہے یا نہیں۔ اگرچہ امریکی انتظامیہ کا موقف ہے کہ اس اقدام کا مقصد تارکینِ وطن کو خود کفیل بنانا اور ٹیکس دہندگان کے پیسوں پر ان کا انحصار کم کرنا ہے، تاہم نیویارک سٹی کے کارپوریشن کونسل سٹیو بینکس اور نیویارک کی اٹارنی جنرل لیٹیشیا جیمز نے واضح کیا کہ انتظامیہ کانگریس کے طے کردہ دائرہ اختیار سے تجاوز کر رہی ہے۔

میئر زوہران ممدانی نے تحفظات کا اظہار کرتے ہوئے کہا کہ اس قانون کے نفاذ سے نیویارک کی تقریباً 38 فیصد یعنی 31 لاکھ سے زائد غیر ملکی آبادی شدید متاثر ہوگی اور قانونی حق رکھنے کے باوجود خوف کے باعث لوگ صحت و خوراک کی بنیادی سہولیات سے محروم ہو جائیں گے۔ مدعی شہروں نے ایڈمنسٹریٹو پروسیجر ایکٹ (APA) کے تحت عدالت میں موقف اختیار کیا ہے کہ حکومت نے قانون کی خلاف ورزی کرنے کے ساتھ ساتھ نوٹس اور عوامی ردعمل کے طے شدہ آئینی و قانونی طریقہ کار کو بھی یکسر نظر انداز کیا ہے، جس سے لاکھوں خاندانوں کا مستقبل داؤ پر لگ گیا ہے۔