فیلڈ مارشل سے لبنانی وزیرِ داخلہ کی ملاقات، سکیورٹی صورتحال پر تبادلہ خیال

لبنان کے وزیرِ داخلہ و بلدیات احمد الحجار نے پاکستان کے اپنے دو روزہ سرکاری دورے کے دوران جنرل ہیڈ کوارٹرز (GHQ) راولپنڈی میں چیف آف ڈیفنس فورسز اور فیلڈ مارشل سید عاصم منیر سے اہم ملاقات کی ہے۔ پاک فوج کے شعبہ تعلقات عامہ (آئی ایس پی آر) کے مطابق اس اعلیٰ سطح کی ملاقات میں باہمی دلچسپی کے امور، خطے کی تیزی سے بدلتی ہوئی سیکیورٹی صورتِ حال اور سیکیورٹی و دفاع کے شعبوں میں دوطرفہ تعلقات کو مزید مستحکم بنانے پر تفصیلی تبادلہ خیال کیا گیا۔

ملاقات کے دوران دونوں ممالک کے سیکیورٹی اداروں کے درمیان ادارہ جاتی روابط کو تقویت دینے اور باہمی تعاون کو فروغ دینے کی اہمیت پر زور دیا گیا۔ فیلڈ مارشل سید عاصم منیر نے لبنان کے ساتھ تعلقات کو مزید مضبوط بنانے کے لیے پاکستان کے پختہ عزم کا اعادہ کرتے ہوئے مشترکہ مفاد پر مبنی شعبوں میں تعاون وسعت دینے کی خواہش ظاہر کی۔ دوسری جانب لبنانی وزیرِ داخلہ نے علاقائی امن و استحکام کے لیے پاکستان کی سفارتی و عسکری کاوشوں کی تعریف کی اور دہشت گردی کے خلاف جنگ میں پاک فوج کی اعلیٰ پیشہ ورانہ صلاحیتوں اور قربانیوں کو تسلیم کیا۔