سعودیہ نے باب المندب کی بندش رکوانے کیلئے اسرائیل سے مدد طلب کی: اسرائیلی اخبار کا دعویٰ

اسرائیلی اخبار نے ایک سنسنی خیز دعویٰ کرتے ہوئے کہا ہے کہ سعودی ولی عہد شہزادہ محمد بن سلمان نے حوثی جنگجوؤں (انصار اللہ) کی جانب سے باب المندب کی سمندری راہداری کی بندش کو روکنے کے لیے اسرائیل سے مبینہ طور پر انٹیلی جنس معاونت طلب کی ہے۔ رپورٹ کے مطابق سعودی عرب نے اس سلسلے میں اسرائیل اور دیگر خلیجی ممالک سے براہِ راست، جبکہ امریکی سینٹرل کمانڈ (سینٹکام) کے ذریعے بالواسطہ رابطے قائم کیے ہیں تاکہ باب المندب کو بین الاقوامی جہاز رانی اور تجارت کے لیے کھلا رکھا جا سکے۔

اخبار کی رپورٹ میں موقف اپنایا گیا ہے کہ یمن کے انصار اللہ کے خلاف فوجی کارروائیوں میں امریکہ کی عدم شرکت کے فیصلے نے سعودی عرب کی سیکیورٹی کو شدید مشکلات سے دوچار کر دیا ہے۔ رپورٹ کے مطابق ریاض حکومت اس وقت متعدد محاذوں پر سیکیورٹی چیلنجز اور اپنی بنیادی اقتصادی برآمدی راہداریوں کی بندش کے خطرے کا سامنا کر رہی ہے۔ تاہم، اسرائیلی میڈیا کی اس رپورٹ اور دعوؤں کے حوالے سے سعودی حکام یا حکومت کی جانب سے فی الحال کوئی باضابطہ تصدیق یا ردِعمل سامنے نہیں آیا ہے۔