اشتیاق کی ہلاکت سے متعلق نئی ویڈیو نے واقعے کا رخ بدل دیا: عظمیٰ بخاری

پنجاب کی وزیر اطلاعات عظمیٰ بخاری نے دعویٰ کیا ہے کہ تحریک انصاف کے کارکن اشتیاق کی ہلاکت سے متعلق ایک اہم ویڈیو منظرِ عام پر آنے کے بعد واقعے کا رخ مکمل طور پر تبدیل ہو گیا ہے۔ لاہور سے جاری کردہ اپنے بیان میں صوبائی وزیر نے بتایا کہ وزیراعلیٰ خیبر پختونخوا سہیل آفریدی اور پی ٹی آئی رہنما سلمان اکرم راجہ کی موجودگی میں اشتیاق کے خاندانی رکن نے واضح کیا کہ یہ ہلاکت ایک حادثہ تھی اور اس میں حکومت یا پنجاب پولیس کا کوئی عمل دخل نہیں ہے۔ انہوں نے مزید الزام عائد کیا کہ حقائق بیان کرنے پر سہیل آفریدی کے گارڈز نے اس شخص اور ویڈیوز بنانے والے صحافیوں پر تشدد اور بدتمیزی کی۔

عظمیٰ بخاری نے تحریک انصاف کے یوٹیوبرز اور قیادت پر اس واقعے کو غلط رنگ دے کر لاشوں پر سیاست کرنے کا الزام عائد کیا۔ انہوں نے کہا کہ وزیراعلیٰ کے پی سہیل آفریدی پشاور سے 530 کلومیٹر کا سفر طے کر کے محض ‘پبلک اسٹنٹ’ اور پوائنٹ اسکورنگ کے لیے لاہور پہنچے ہیں، جبکہ ان کی اپنی صوبائی سرحد کے قریب کوہاٹ میں کوئلے کی کان کے حادثے میں 4 افراد جاں بحق ہوئے جہاں انہوں نے جانا بھی گوارا نہیں کیا۔ صوبائی وزیر اطلاعات نے اشتیاق کے بیٹے کا بیان بھی میڈیا سے شیئر کیا جس میں والد کی موت کو حادثاتی قرار دیا گیا ہے۔