پاکستان کی 16 کمپنیوں کو روس کو مچھلی برآمد کرنے کی اجازت مل گئی

وفاقی وزیر بحری امور جنید انوار چودھری نے ماہی گیری کے شعبے میں ایک بڑی اور تاریخی کامیابی کا اعلان کرتے ہوئے بتایا ہے کہ پاکستان نے پہلی بار روسی مارکیٹ تک مچھلی اور سی فوڈ کی برآمدات کے لیے رسائی حاصل کر لی ہے۔ اس اہم پیشرفت کے نتیجے میں پاکستان کی 16 کمپنیوں کو روس کو مصنوعات برآمد کرنے کی باقاعدہ اجازت مل گئی ہے۔

وفاقی وزیر کے مطابق روسی مارکیٹ میں داخلے سے نہ صرف ملکی معیشت کو سہارا ملے گا بلکہ یوریشین اکنامک یونین کے دیگر ممالک تک رسائی کے امکانات بھی روشن ہو گئے ہیں۔ انہوں نے بتایا کہ اس وقت پاکستان کی سالانہ سی فوڈ برآمدات 500 ملین ڈالر کے قریب ہیں، تاہم روس کے ساتھ تجارت کے آغاز سے یہ حجم 800 ملین ڈالر تک پہنچنے کی توقع ہے، جس میں ابتدائی طور پر روس سے 300 ملین ڈالر کی آمدن متوقع ہے۔

جنید انوار چودھری نے واضح کیا کہ میرین فشریز ڈیپارٹمنٹ عالمی منڈیوں میں مسابقت کے لیے بین الاقوامی معیار کو سختی سے یقینی بنا رہا ہے۔ برآمدات کے لیے سمندری اور فضائی راستوں کے ساتھ ساتھ وسطی ایشیائی ممالک کے ذریعے زمینی راستے کو بھی استعمال کیا جائے گا، جو کہ ایک کم لاگت تجارتی راہداری ثابت ہوگا۔ انہوں نے مزید کہا کہ قازقستان، ازبکستان اور ترکمانستان میں پاکستانی مچھلی کی بڑھتی ہوئی طلب ملکی برآمدات کو مزید وسعت دے گی اور پاکستانی بندرگاہیں اس علاقائی تجارت میں ریڑھ کی ہڈی کا کردار ادا کریں گی۔