حکومت کا رواں مالی سال سے ہائبرڈ سکوک بانڈز کے اجرا کا فیصلہ

وفاقی وزارت خزانہ نے ملکی تاریخ میں پہلی مرتبہ رواں مالی سال سے ہائبرڈ سکوک بانڈز کے اجرا کا بڑا فیصلہ کیا ہے۔ وزارت خزانہ کے ذرائع کے مطابق، اس نئی فنانسنگ حکمتِ عملی کے تحت حکومت روایتی طور پر اثاثے گروی رکھنے کے علاوہ اب کموڈیٹی (اجناس) فروخت کر کے بھی مارکیٹ سے فنانسنگ حاصل کر سکے گی، جس کے لیے تھرڈ پارٹی کی خدمات حاصل کی جائیں گی۔ ہائبرڈ سکوک بانڈز کے اجرا کا یہ پلان بین الاقوامی مالیاتی فنڈ (آئی ایم ایف) کے ساتھ بھی شیئر کیا جائے گا۔ دوسری جانب، وزارت خزانہ نے نیشنل ہائی وے اتھارٹی (این ایچ اے) کو سکوک بانڈز جاری کرنے کے لیے اثاثوں کی تفصیلات فراہم کرنے کی ہدایت کی ہے۔ این ایچ اے کے اثاثوں کی مالیت کا تخمینہ تقریباً 7 ہزار ارب روپے سے زائد لگایا گیا ہے، جو گزشتہ مالی سال محض ساڑھے 5 ارب روپے کے لگ بھگ تھا؛ اب انہی اثاثوں کی اضافی مالیت کے حساب سے نئے بانڈز جاری کیے جائیں گے۔