افغانستان سے ملکر دہشتگرد حملہ آور ہوتے ہیں، خاتمے تک جنگ جاری رہے گی: شہباز شریف

وزیراعظم محمد شہباز شریف نے واشگاف الفاظ میں اعلان کیا ہے کہ دہشت گردی کے مکمل خاتمے اور آخری فسادی کی سرکوبی تک جنگ جاری رہے گی۔ کوئٹہ میں صوبائی ایپکس کمیٹی کے اعلیٰ سطحی اجلاس سے خطاب کرتے ہوئے وزیراعظم نے انکشاف کیا کہ دہشت گرد پاکستان میں حملوں کے لیے افغان سرزمین کا استعمال کر رہے ہیں جبکہ ہمارا مشرقی ہمسایہ ان شرپسندوں کو اسلحہ اور مالی معاونت فراہم کر رہا ہے۔ انہوں نے بتایا کہ گزشتہ 4 دنوں میں دہشت گردی کے سنگین واقعات پیش آئے، تاہم سکیورٹی فورسز نے بھرپور جوابی کارروائی کرتے ہوئے 54 دہشت گردوں کو جہنم واصل کر دیا۔ وزیراعظم نے فتنہ الخوارج اور خیبرپختونخوا میں سرگرم خارجی عناصر کے مذموم عزائم کو ناکام بنانے کے عزم کا اعادہ کرتے ہوئے کہا کہ پاکستان کی سفارتی کامیابیاں دشمنوں کو ہضم نہیں ہو رہیں، مگر پوری قوم مسلح افواج کی لازوال قربانیوں کے ساتھ کھڑی ہے۔ آرمی چیف فیلڈ مارشل سید عاصم منیر، گورنر اور وزیراعلیٰ بلوچستان کی موجودگی میں ہونے والے اس اجلاس کے اختتام پر وزیراعظم نے وطن پر جان نچھاور کرنے والے شہداء کے درجات کی بلندی کے لیے خصوصی دعا بھی کی۔