ظہران ممدانی کا ارجنٹینا و مصر کے میچ میں متنازع فیصلوں پر ردِعمل

نیویارک: امریکہ کے معروف شہر نیویارک کے میئر ظہران ممدانی بھی ارجنٹینا اور مصر کے درمیان کھیلے گئے فٹ بال میچ میں ہونے والے متنازع فیصلوں پر میدان میں آ گئے ہیں، جس نے سوشل میڈیا پر جاری بحث کو ایک نیا رخ دے دیا ہے۔

تفصیلات کے مطابق، میئر ظہران ممدانی نیویارک میں اپنے نئے ٹرانزٹ منصوبے ’نیکسٹسٹاپ: بیٹر بسز، فاسٹر سروس‘ (NextStop: Better Buses, Faster Service) کی رونمائی کے موقع پر میڈیا سے گفتگو کر رہے تھے۔ انہوں نے پریس کانفرنس کے دوران نئے منصوبے کے فوائد پر روشنی ڈالتے ہوئے کہا کہ بہتر سفری سہولتیں مسافروں کا قیمتی وقت بچانے میں کلیدی کردار ادا کرتی ہیں اور اس منصوبے کے تحت عوامی ٹرانسپورٹ کے سفر کا دورانیہ نمایاں طور پر کم ہو جائے گا۔

میئر نیویارک کا کہنا تھا کہ سفر کا دورانیہ کم ہونے کا براہِ راست فائدہ شہریوں کی سماجی زندگی کو ہو گا۔”جب سفر کا وقت بچے گا، تو اس کا مطلب یہ ہے کہ آپ صبح کام پر روانہ ہونے سے پہلے سکون کے ساتھ اپنی فیملی کے ساتھ ناشتہ کر سکتے ہیں، اور اسی طرح شام کو بھی وقت پر گھر واپس پہنچ کر اپنے بچوں کے ساتھ خوش گوار لمحات گزار سکتے ہیں۔”

پریس کانفرنس کے اختتام پر میئر ظہران ممدانی نے ارجنٹینا اور مصر کے حالیہ ہائی وولٹیج میچ کا تذکرہ چھیڑ دیا، جہاں وہ ریفری کے متنازع فیصلوں پر مصری ٹیم کے حق میں کھڑے دکھائی دیے۔

انہوں نے صحافیوں کے ساتھ گفتگو کو سمیٹتے ہوئے مسکراتے ہوئے کہا کہ: “سفر کا وقت جلدی ختم ہونے کا ایک مطلب یہ بھی ہے کہ اب آپ کے پاس اتنا وقت ہوگا کہ آپ اپنے دوستوں کی اس بات سے کھل کر اتفاق کر سکیں کہ کل کا میچ واقعی مصر سے چھینا گیا تھا۔”

میئر نیویارک کے اس غیر متوقع اور دلچسپ ردِعمل نے فٹ بال شائقین اور سوشل میڈیا صارفین کی توجہ حاصل کر لی ہے، جس سے انٹرنیٹ پر پہلے سے جاری گرما گرمی مزید بڑھ گئی ہے۔ واضح رہے کہ ارجنٹینا کی مصر کے خلاف ڈرامائی اور اعصاب شکن فتح کے بعد مصری ٹیم کے ہیڈ کوچ، کھلاڑی اور دنیا بھر کے مداح ریفریز کے فیصلوں کو شدید تنقید کا نشانہ بنا رہے ہیں۔