محکمہ ایکسائز کا 25 ارب 43 کروڑ روپے کا ریکارڈ ریونیو جمع

محکمہ ایکسائز اسلام آباد نے مالی سال 2025-26 کے دوران شاندار کارکردگی کا مظاہرہ کرتے ہوئے ریکارڈ 25 ارب 43 کروڑ روپے کا ریونیو قومی خزانے میں جمع کرا دیا ہے۔ محکمہ کی جانب سے جاری کردہ اعداد و شمار کے مطابق، یہ رقم گاڑیوں کی رجسٹریشن فیس، روڈ ٹیکس، ہوٹل ٹیکس اور پروفیشنل ٹیکس سمیت مختلف مدات کے ذریعے وصول کی گئی، جس میں سے 19 ارب 13 کروڑ روپے ایکسائز جبکہ 6 ارب 30 کروڑ روپے دیگر ٹیکسز کی مد میں حاصل ہوئے۔ ڈی جی ایکسائز اسلام آباد نے اس کامیابی پر گفتگو کرتے ہوئے کہا کہ گزشتہ مالی سال متعارف کرائی گئی جدید اور عوام دوست پالیسیوں کے مثبت نتائج سامنے آئے ہیں۔ انہوں نے مزید کہا کہ ریونیو میں یہ نمایاں اضافہ محکمے پر شہریوں کے مضبوط ہوتے اعتماد کا ثبوت ہے اور مستقبل میں بھی شفافیت اور مؤثر خدمات کی فراہمی کا یہ سلسلہ جاری رہے گا۔