نیشنل ایکشن پلان کی ایپکس کمیٹی کا اجلاس، وزیراعظم اور فیلڈ مارشل عاصم منیر شریک

وزیراعظم محمد شہباز شریف کی زیرِ صدارت کوئٹہ میں نیشنل ایکشن پلان کی صوبائی ایپکس کمیٹی کا انتہائی اہم اجلاس شروع ہو گیا ہے، جس میں بلوچستان میں امن و امان کی مجموعی صورتِ حال کا تفصیلی جائزہ لینے کے ساتھ ساتھ اہم ترین فیصلے کیے جائیں گے۔ اس اعلیٰ سطحی اجلاس میں چیف آف آرمی سٹاف و چیف آف ڈیفنس فورسز فیلڈ مارشل سید عاصم منیر، گورنر بلوچستان جعفر خان مندوخیل، اور وزیراعلیٰ بلوچستان میر سرفراز بگٹی سمیت قانون نافذ کرنے والے اداروں کے سربراہان شریک ہیں۔ اس کے علاوہ وفاقی وزراء احد خان چیمہ، عطا اللہ تارڑ اور وزیراعظم کے مشیر رانا ثناء اللہ بھی اجلاس کا حصہ ہیں۔ اس سے قبل وزیراعظم شہباز شریف ایک روزہ دورے پر کوئٹہ پہنچے، جہاں ہوائی اڈے پر گورنر، وزیراعلیٰ بلوچستان اور اعلیٰ سول و عسکری حکام نے ان کا پرتپاک استقبال کیا۔