سٹاک مارکیٹ میں اتار چڑھاؤ، ہنڈرڈ انڈٰیکس منفی زون میں بند ہوا

پاکستان اسٹاک مارکیٹ (PSX) میں کاروباری ہفتے کے چوتھے روز زبردست اتار چڑھاؤ کے بعد ہنڈرڈ انڈیکس کا اختتام منفی زون میں ہوا ہے۔ آج کاروبار کے آغاز پر مارکیٹ میں زبردست تیزی دیکھی گئی اور انڈیکس 600 سے زائد پوائنٹس کے اضافے کے ساتھ ایک لاکھ 82 ہزار 253 پوائنٹس کی بلند سطح پر پہنچ گیا۔ تاہم، یہ تیزی برقرار نہ رہ سکی اور انڈیکس یکدم اوندھے منہ گرتے ہوئے اچانک مندی کی لپیٹ میں آ گیا، جو مارکیٹ کے اختتام تک جاری رہی۔ کاروباری وقت ختم ہونے پر ہنڈرڈ انڈیکس 369 پوائنٹس کی کمی کے ساتھ ایک لاکھ 81 ہزار 259 پوائنٹس کی سطح پر بند ہوا۔ یاد رہے کہ گزشتہ کاروباری روز بھی اسٹاک مارکیٹ شدید ترین کریش کا شکار ہوئی تھی جہاں انڈیکس 4626 پوائنٹس کی بڑی مندی کے ساتھ ایک لاکھ 81 ہزار 629 پوائنٹس پر بند ہوا تھا، اور آج مسلسل دوسرے روز بھی مارکیٹ مندی کے دباؤ سے باہر نہ نکل سکی۔