وزن کم کرنے والی ادویات نشے کی طلب کم کرنے میں بھی مددگار!

وزن کم کرنے اور ذیابیطس کے علاج کے لیے استعمال ہونے والی دنیا کی معروف ادویات اوزیمپک (Ozempic) اور ویگووی (Wegovy) سے متعلق ایک نئی سائنسی تحقیق نے ان کے حیران کن فوائد کا نیا پہلو پیش کیا ہے۔ ماہرینِ صحت کے مطابق یہ ادویات نہ صرف بھوک پر قابو پا کر وزن گھٹاتی ہیں، بلکہ الکوحل (شراب) اور دیگر نشہ آور اشیا کے استعمال کی شدید خواہش (Cravings) کو بھی نمایاں حد تک کم کر سکتی ہیں۔

یہ ادویات جی ایل پی-1 (GLP-1) ایگنسٹس کے گروپ سے تعلق رکھتی ہیں، جو اصل میں ٹائپ 2 ذیابیطس کے لیے تیار کی گئی تھیں۔ یہ جسم کے قدرتی ہارمون GLP-1 کی نقل کرتے ہوئے انسولین کی مقدار بڑھاتی ہیں اور ہاضمے کا عمل سست کر کے پیٹ بھرے رہنے کا احساس برقرار رکھتی ہیں۔

دماغ کے ‘ریوارڈ سسٹم’ پر اثرات سائنسدانوں کے مطابق جب انسان کسی پسندیدہ کھانے یا نشہ آور شے کے بارے میں سوچتا ہے تو دماغ کا ریوارڈ سسٹم متحرک ہو کر شدید طلب پیدا کرتا ہے۔ یہی طلب زیادہ فعال ہو جائے تو موٹاپے اور نشے کی لت جیسے مسائل جنم لیتے ہیں۔

تحقیق سے معلوم ہوا ہے کہ جی ایل پی-1 ادویات دماغ کے اسی ریوارڈ سسٹم کو اعتدال میں لاتی ہیں۔ جانوروں پر کیے گئے تجربات اور انسانوں کے مشاہداتی ڈیٹا سے یہ بات سامنے آئی ہے کہ ان ادویات کے استعمال سے الکوحل کے علاوہ کوکین، افیون، نکوٹین (سگریٹ) اور ایمفیٹامین جیسی اشیا کی طلب میں بھی واضح کمی دیکھی گئی ہے۔ ماہرین کا ماننا ہے کہ مستقبل میں یہ ادویات نشے کی بیماریوں کا علاج ڈھونڈنے میں اہم پیش رفت ثابت ہو سکتی ہیں۔