یوٹیوبر مسٹر بیسٹ پر کمپنی کی سابقہ ملازمہ کے سنگین الزامات

دنیا کے مقبول ترین یوٹیوبر جمی ڈونلڈسن، جو مسٹر بیسٹ (MrBeast) کے نام سے مشہور ہیں، ایک سنگین قانونی تنازعے کی زد میں آگئے ہیں۔ ان کی کمپنی کے خلاف ایک سابق خاتون ملازمہ، لورین نے جنسی ہراسانی، صنفی امتیاز اور زچگی کی چھٹی (Maternity Leave) سے واپسی پر ملازمت سے غیر قانونی برطرفی کے الزامات کے تحت مقدمہ دائر کر دیا ہے۔
لورین کی جانب سے دائر کردہ درخواست میں کمپنی کے کام کرنے والے ماحول پر سخت سوالات اٹھائے گئے ہیں دعویٰ کیا گیا ہے کہ کمپنی کا ماحول خواتین کے لیے تضحیک آمیز تھا اور وہاں صنفی بنیادوں پر امتیاز برتا جاتا تھا۔ لورین کا مؤقف ہے کہ زچگی کی چھٹی کے فوری بعد انہیں ملازمت سے نکالنا امریکی ‘فیملی اینڈ میڈیکل لیو ایکٹ’ (FMLA) کی کھلی خلاف ورزی ہے۔ مقدمے میں کمپنی کے سی ای او جیمز وارن کے حوالے سے بھی غیر موزوں اور نازیبا گفتگو کا ذکر کیا گیا ہے۔
دوسری جانب مسٹر بیسٹ کی کمپنی بیسٹ انڈسٹریز (Beast Industries) نے ان تمام الزامات کو قطعی طور پر بے بنیاد اور شہرت حاصل کرنے کا ایک حربہ قرار دیا ہے۔ کمپنی کے ترجمان کا کہنا ہے کہ:لورین کو کسی ہراسانی کی وجہ سے نہیں بلکہ کمپنی میں ہونے والی تنظیمی تبدیلیوں اور ان کے عہدے کی ضرورت ختم ہونے پر فارغ کیا گیا۔کمپنی نے ثبوت کے طور پر کچھ اسکرین شاٹس بھی پیش کیے ہیں جن میں ساتھی ملازمین لورین کو ڈیلیوری کے دوران آرام کرنے کا مشورہ دیتے نظر آتے ہیں۔
یہ قانونی جنگ ایک ایسے وقت میں سامنے آئی ہے جب جمی ڈونلڈسن دنیا کے بااثر ترین افراد کی فہرستوں میں شامل ہو رہے ہیں۔ ماہرین کا کہنا ہے کہ یہ مقدمہ مسٹر بیسٹ کی میڈیا سلطنت اور ان کے عالمی برانڈ کی ساکھ کے لیے ایک بڑا امتحان ثابت ہو سکتا ہے۔ عدالت میں ہونے والی کارروائی طے کرے گی کہ آیا یہ الزامات درست ہیں یا محض کمپنی کی تنظیمِ نو کا نتیجہ۔